Бээжинд хоёр өдрийн айлчлал хийсэн АНУ-ын Төрийн нарийн бичгийн дарга Энтони Блинкенийг БНХАУ-ын дарга Ши Жиньпин даваа гарагт хүлээн авч уулзлаа.
 

Гэхдээ санал зөрөлдөх олон асуудал нээлттэй хэвээр байгааг Блинкен онцолжээ.

Тяньаньмэний талбай дахь Ардын Их Хурлын ордонд 35 минут үргэлжилсэн уулзалтын дараа Блинкен сэтгүүлчдийн асуултад хариулахдаа "Дээд түвшний харилцаа холбоо нь сөргөлдөөнийг хариуцлагатайгаар зохицуулж, өрсөлдөөнийг цаашид зөрчил тэмцэлд хүргэхгүй байх хамгийн сайн арга.  Би хятад нөхдөөс ч мөн ийм үгийг сонссон. Бид харилцаагаа тогтворжуулах хэрэгтэй гэдэг дээр санал нэг байна” гэлээ.

Бээжин, Вашингтоны харилцаа Трампын үеийн худалдааны дайнаас эхлэн муудаж өнгөрсөн жил өрнөсөн Тайванийн асуудал, энэ оны эхээр Хятадын агаарын бөмбөлгийг АНУ-ын нутаг дэвсгэр дээр буудаж унагасан хэрэг явдлаас үүдэн улам бүр хурцадсан билээ.