Сүүлийн өдрүүдэд “Төгрөг нуурын” ордтой холбоотой асуудал улс төрийн хүрээнд ширүүн маргаан үүсгэж байна. Тиймээс уншигч та бүхэнд тус ордын талаар товчхон мэдээлэл хүргэе. 
Төгрөг нуур нь төв аймгийн Баян сумын нутагт орших Монгол Улсын стратегийн ач холбогдол бүхий 39 ордын нэг юм. Улаанбаатар хотоос 130 км зайд байрлах энэ орд нь Чойр-Нялгын сав газарт хамаарах бөгөөд доод цэрдийн настай хүрэн нүүрсний давхаргатай. Урьдчилсан тооцоогоор ордын нөөц 3 тэрбум тонн хүрэн нүүрс гэж үнэлэгдэж байна.

Төгрөг нуурын бүлэг ордод 10 гаруй компани лиценз эзэмшдэг бөгөөд эдгээрийн дотор: 
- "Төгрөг нуур энержи" ХХК – Тахилт талбайд 68 сая тонн нүүрсний нөөц тогтоосон.
- "Төгрөг нуур девелопмент" ХХК – Төгрөг нуур 1 талбайд үйл ажиллагаа явуулдаг.
- "Төгрөг тал" ХХК – Төгрөг болон Төгрөг нуур талбайд лиценз эзэмшдэг.
- "Цэцэнс холдинг", "Коммонмакс", "Монроспром уголь" зэрэг компаниуд бусад талбайд ашиглалтын тусгай зөвшөөрөл эзэмшиж байна. 
Төгрөг нуурын ордын хамгийн том хувьцаа эзэмшигч нь анх "Төгрөг нуур энержи" ХХК байсан бөгөөд энэ компани нь 2007 онд УИХ-ын гишүүн Х. Баттулгын үүсгэн байгуулсан "САМЕХ" компанийн эзэмшилд оржээ. Дараа нь "САМЕХ" компани нь өөрийн хувьцааны 54.5 хувийг Сингапурын болон Хятадын түншүүддээ шилжүүлсэн бөгөөд эцэст нь Кайманы арлуудад бүртгэлтэй "Минг Хинг Уотерворкс Холдингс Лимитед" компанид Хонконгийн хөрөнгийн биржээр дамжуулан 250 сая ам.доллараар худалдаалсан байна.

Энэхүү хэлцлийн үр дүнд Төгрөг нуурын орд нь гадаадын хөрөнгө оруулагчдын мэдэлд шилжсэн бөгөөд Монгол Улсын стратегийн ач холбогдол бүхий орд газрын хувьцаа эзэмшигчдийн бүтэц нь олон улсын оффшор компаниудаар дамжин төрийн мэдлээс гарчээ. Энэ талаар ЗГХЭГ-ын дарга Н.Учрал “Төгрөгнуурын энержи” ХХК-ийн хувьцаа эзэмшигч болох “САМЕХ” ХХК нь татвар төлөхөөс зайлсхийх, мөнгө угаах, залилах, авлига, ашиг сонирхлын зөрчил үүсгэсэн болон бусад гэмт хэрэг, зөрчил үйлдсэн байж болзошгүй асуудлыг хууль хяналтын байгууллагаар шалгуулна”хэмээн мэдэгдсэн. 

Монгол Улсын Засгийн газар стратегийн ордуудын ашиглалтыг илүү үр ашигтай, ил тод болгох зорилгоор дараах бодлогыг баримталж байгаа. 
- Төрийн эзэмшлийн хувь: Ашигт малтмалын хуулийн дагуу стратегийн орд газрын нэг эзэмшигчийн хувь эзэмшил 34%-аас илүүгүй байх зохицуулалттай. Энэ нь төрийн хяналтыг хангах зорилготой.
- Үндэсний баялгийн сан: Төрийн эзэмшлийн ногдол ашгийг Үндэсний баялгийн санд төвлөрүүлж, иргэдэд тэгш, шударга хуваарилах зорилготой.
- Ил тод байдал, засаглал: Төрийн болон орон нутгийн өмчит компанийн бүтээмж, ил тод байдал, засаглалыг сайжруулах тухай хуулийн төслийг өргөн барьсан.

Эдгээр бодлогын хүрээнд Төгрөг нуурын ордын ашиглалтыг эрчимжүүлэх, эдийн засгийн үр ашгийг нэмэгдүүлэх зорилт тавигдаж байна.
Төгрөг нуурын орд нь Монгол Улсын эрчим хүчний салбарт чухал үүрэг гүйцэтгэх боломжтой. Хувийн хэвшлийн хөрөнгө оруулалт, төрийн бодлогын уялдаа, ил тод байдал, засаглалын сайжруулалт нь ордын үр ашигтай ашиглалтад чухал нөлөөтэй. Camex компанийн асуудал нь тус ордын үйл ажиллагаанд сөргөөр нөлөөлж болзошгүй тул холбогдох байгууллагууд анхаарал хандуулах шаардлагатай байна.