Боловсролын салбарынхан ажил хаялт зарлаад 7 дахь өдрөө үргэлжилж байна. Сарын сүүл ирсэн өдийд багш, ажилчдын цалин буух үе ирдэг. Гэтэл  ажил хаяж байгаа багш нарын цалинг олгох, эсэх нь тодорхойгүй байгаа бөгөөд салбарын сайдын эрх мэдлээс хэтэрсэн гэдгийг Боловсролын сайд П.Наранбаяр хэлээд буй. 

Учир нь багш процесс дуусаагүй үед ажил хаясан нь хүндрэлтэй байдлыг үүсгэсэн аж. Тодруулбал, Арбитрын хэлэлцээр эхлээгүй байх үед ажил хаяж болохгүй гэсэн хуулийн заалттай байдаг байна. Боловсролын сайд П.Наранбаяр хэлэхдээ "Арбитрын хэлэлцээр эхлээгүй байх үед багш нар ажил хаяж эхэлсэн нь энэ ажил хаялт хууль ёсны байж чадах уу, үгүй юү гэдэг асуултыг бий болгож байна. Арбитрын дүн гараагүй байхад ажил хаялт эхэлчихсэн байдаг. Багш нарын өмнөөс санаа зовж байна. Одоо бол миний мэдлээс хэтэрсэн асуудал болчихсон. Цаашдаа шүүхээр ажил хаялтын асуудлыг шийдэх ёстой. Ажил хаялтад оролцсон багш нар ямар нэгэн хариуцлага хүлээх ёсгүй" гэсэн юм.