Мод тэврэлтийн дэлхийн аварга шалгаруулах хоёрдугаар тэмцээнд Финландад энэ жил хоёр дахь удаагаа зохион байгуулагдаж байна. Дэлхийн аварга шалгаруулах тэмцээн гэхээр уншигч авхай спортын тэмцээн гэж андууруузай. Байгаль дэлхийг хайрлах хайраа хамгийн сайнаар илэрхийлэн гаргаж гэрэл зурагт мөнхөлсөн тэр хүмүүс ялагчаар тодрох учиртай гэрэл зургийн шалгаруулалт юм шүү.

Тэмцээн хоёр янзаар явагдах юм байна. Эхнийх нь онлайн хэлбэртэй байх бөгөөд энэ үе шатанд та дэлхийн хаанаас ч, /тухайлбал Монголоос/ оролцож болно. Онлайн тэмцээний бүртгэл энэ сарын 13-нд эхэлсэн бөгөөд 28-ныг хүртэл үргэлжилнэ. Харин оффлайн буюу Финландад очих боломжтой  шилдгүүдийн өрсөлдөөн Лапланд дахь Леви хэмээх амралт сувиллын хотхоны ойролцоо Халипуу ойд “амьдаар” зохион байгуулагдах гэнэ.  

Энэхүү шалгаруулалтыг явуулснаар хүмүүст байгаль, ой модыг хайрлах эерэг хандлага бий болгож чадна гэж зохион байгуулагчид нь найдаж байгаа ажээ.  

Хэрхэн оролцох вэ

 Онлайн шалгаруулалт-2021 оны наймдугаар сарын 13-28

-Дээр хэлсэнчлэн, энэ шатанд та дэлхийн аль ч цэгээс оролцох боломжтой. Үүний тулд таалагдсан модоо олж очоод хамаг л хайраа илэрхийлэн чангаар тэврэн гэрэл зургаа татуулж, бусадтайгаа хуваалцахад л хангалттай.

-Гэрэл зургаа HaliPuu’s Forest in Your Pocket аппликейшн ашиглан бусадтай хуваалцах бөгөөд зураг авахуулсан буюу тухайн мод байгаа газрын байршлыг бас давхар оруулж өгөх ёстой юм.  

-https://www.halipuu.com/ цахим хаягт гишүүнээр бүртгүүлэх юм уу, зүгээр Instagram хуудастаа зургаа оруулаад #TreeHugging2021, #HaliPuu гэсэн хэштэг ашигласан ч болно. Модны байрлалыг аппликейшнд оруулахдаа Google map ашиглаж болно.

-Шалгаруулалтад оролцох санаа хэрхэн төрсөн, мод тэвэрч байхад ямар сэтгэгдэл төрсөн зэргээ бичээрэй.

Илгээсэн зургуудыг Паллас-Юлдстунтури (Pallas-Yllдstunturi National Park) үндэсний хүрээлэнгийн ахлах зөвлөх, ойн мэргэжилтэн, урлагийн хараат бус шинжээчдээс бүрдсэн баг анхааралтай шүүгээд хамгийн чин сэтгэлээсээ хайраа илэрхийлсэн, хамгийн уран бүтээлч, урлагтайг нь шалгаруулж шагнах юм.

-Мэдүүлгийг 28-ны өглөөний 11 цаг хүртэл авч, ялагчийг энэ сарын 29-ний ням гаригийн үд дунд HaliPuu (https://happs.tv/@RiittaRW) шууд эфирээр тодруулна. Шагнал нь ирэх жил Лапландад очиж, оффлайн шалгаруулалтад оролцох эрх болон бусад шагнал байх гэнэ.

Оффлайн шалгаруулалт

Халипуу ойд болох оффлайн шалгаруулалт нэгэн зэрэг гурван ангиллаар шилдгээ шалгаруулна.

Хурд-Оролцогчид зааж өгсөн газар нутагт 80 минутын хугацаанд аль болох олон мод тэвэрч өрсөлдөнө. Ингэхдээ нэг модыг хамгийн багадаа таван секунд тэврэх ёстой гэсэн шалгууртай.

Чин сэтгэл-Дараа нь тамирчин модыг нэг минут тэврэхдээ чин сэтгэлээ хэр зэрэг илэрхийлж чадаж байгааг дүгнэнэ.

Чөлөөт-Модонд хайраа илэрхийлэхдээ ямар шинэлэг санаа, санаачилга гаргаж, өвөрмөц байдлаар “хайрлав” гэдгийг шалгаруулна. Энэ нь бараг л чин сэтгэл, чөлөөт хэв маягийн нийлэмж юм. Даалгавраа нэг минутын дотор хийх ёстой.  

Ялагч нь “Мод хайрлалтын 2021 оны дэлхийн аварга” гэсэн эрхэм нэр алдрын эзэн болохоос гадна бусад бэлэгний эзэн болно.