Монгол Улс цахим үндэстэн болох хөгжлийн зорилт тавьснаар гурав дахь онтойгоо золгох гэж байна. Мобиком компани үйл ажиллагаа явуулж эхэлснээс хойш 2016 оныг хүртэл Монголын харилцаа холбоо зөвхөн ярианд суурилсан үйлчилгээ үзүүлж ирсэн бол ЮНИТЕЛ группийн зүгээс 4G сүлжээг нэвтрүүлснээр гар утасны өндөр хурдны интернэт бий болсон түүхтэй.

Ярианд суурилсан бидний хэвшмэл ойлголтод ДАТА үйлчилгээ нэвтэрсэн нь банкны үйлчилгээнээс эхлээд иргэдийн өдөр тутмын хэрэгцээ шаардлага гар утас руу орж ирсэн нь энэ. Хамгийн ойрын жишээ нь, өдгөө 1.7 сая хэрэглэгчтэй болсон "И-Монголиа" системийг дурдаж болно. Өөрөөр хэлбэл, цахим шилжилтийн томоохон суурийг тавьсан энэ системийг нэвтрүүлэх үндсэн хөшүүрэг нь 4G сүлжээ байсан гэсэн үг. Хэрвээ хувийн хэвшил нь хөрөнгө, хүч гаргаад 4G сүлжээг дотоодод нэвтрүүлээгүй бол өнөөгийн "И-Монголиа" систем байх эсэх нь асуултын тэмдэг.

Өдгөө Монгол Улсын нийт газар нутгийн гуравны нэгийг шилэн кабельд холбох ажлыг харилцаа холбооны салбарт тусгай зөвшөөрөл эзэмшдэг компаниуд хийж гүйцэтгэжээ. 4G сүлжээг анхлан нэвтрүүлсэн ЮНИТЕЛ группийн хувьд зөвхөн дэд бүтцийн ажилд нэг их наяд төгрөгийг зарцуулсан гэж тооцвол энэ салбарт хэдий хэмжээний хөрөнгө оруулалт хийсэн, хийж яваа нь ойлгомжтой. Тус группийн зүгээс цаашдаа 5G сүлжээг нэвтрүүлэх бэлтгэл ажлаа хангаад яваа юм билээ.

Үндсэндээ Төрөөс ямар нэгэн дэмжлэггүй ч дэлхий нийттэй өрсөлдөхүйц хэмжээнд хөгжлийн энтэй яваа ганц салбар нь харилцаа холбооны тусгай зөвшөөрөл эзэмшигч компаниуд юм. Аливаа улс орны харилцаа холбоо нь хэдий чинээ хөгжинө тэр хэрээрээ нийгэм, эдийн засгийн суурь нь бэхжиж, бас урагшилдаг жамтай. Өөрөөр хэлбэл, харилцааны холбооны дэвшилтэд технологийн чиг хандлага нь тухайн улсынхаа хөгжлийн тодорхойлох нь бий.

Гагцхүү өөрсдийн хөрөнгө оруулалт, хүний нөөцийн хүчээр дэлхийн харилцаа холбооны чиг хандлагатай хөл нийлүүлж яваа тэдний зүгээс Төрөөс хууль эрх зүйн тогтвортой, ойлгомжтой байдлыг хүсэж буйгаа ЮНИТЕЛ группийн гүйцэтгэх захирал Д.Жамъяншарав Монголын эдийн засгийн чуулганы индрээс гадаад, дотоодын хөрөнгө оруулагчдын өмнө илэрхийлжээ.