Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын хаврын чуулган өнөөдөр хаалтаа хийлээ. Энэ удаагийн ээлжит чуулган ажлын 82 өдөр үргэлжилж, 200 орчим хууль, УИХ-ын 65 тогтоол баталснаар ийнхүү өндөрлөв. 

УИХ-ын дарга Г.Занданшатар чуулганыг хааж хэлсэн үгэндээ "Улсын Их Хурлын гишүүд бол дарга биш ард түмний “элч төлөөлөгч” байх тогтолцоог бэхжүүлэх үүднээс гишүүдийн тоог 126 болгон нэмэгдүүлж, сонгуулийн холимог тогтолцоог Үндсэн хуульд бататгасан нь энэ чуулганы чухал үр дүн болж байгаа" гэдгийг онцоллоо. Мөн тэрбээр "Улсын Их Хурлын  сонгуулийн тухай хуульд нэмэлт, өөрчлөлт оруулах тухай, Улс төрийн намын тухай хуулиуд, нийгмийн даатгалын болон боловсролын багц хуулийг баталсан нь эрх зүйн томоохон шинэчлэлт болж буй" хэмээв. 

Хаврын чуулганы эхэнд парламент гурван чиглэлээр 10 багц эрх зүйн шинэчлэл хийхээр төлөвлөж байгаагаа дурдсан. Онцлох хуулиудаас дурдвал Үндсэн хууль, Улс төрийн намын тухай, Сонгуулийн тухай, Боловсролын багц хуульд өөрчлөлт оруулав. 

Чуулганы хаалтын үйл ажиллагаанаас бэлтгэсэн фото сурвалжилгыг хүргэж байна.