БНХАУ-ын алслагдсан тосгоноос өнгөрсөн жил харанхуй өрөөнд гав гинжтэй хоригдсон эмэгтэй олдож, олон нийтийг айдаст автуулж байсан. Энэ хэргийг саяхан БНХАУ-ын Шүүх хэлэлцэж, хэрэгтнүүдэд ял оноожээ. Хэргийг хулгайлагдсан эмэгтэй нөхөр өөр таван хүнтэй хамтран үйлдсэн байж. Шүүхээс хэргийн гол эзэн болох нөхөрт есөн жил, хамтарч оролцсон бусад таван этгээдэд 8-13 жил хорих ял оноосон байна.

БНХАУ-д хүн амын хүйсийн харьцаа алдагдсанаас эмэгтэйчүүдийг хулгайлж хүчээр эхнэрээ болгодог “Сүйт бүсгүйн хулгай” гэх хэрэг газар авч байсныг энэ удаагийн хэрэг дахин олон нийтийн анхааралд оруулж ирсэн байна.   

Цянсу мужийн Сюйчжоу хотоос холгүй тосгонд амьдрах Сяохуамей бүсгүйн өрөвдөлтэй нөхцөл байдлын талаар Фэнсяний нэгэн влогер өнгөрсөн оны нэгдүгээр сард олон нийтэд ил болгож байжээ. Энэ бүсгүй 40 наслахдаа найман хүүхэд төрүүлсэн ч хүзүүндээ гинжтэй, өрөөнөөсөө гарах боломжгүй орчинд амьдарч байсан аж.