Энэтхэгийн Уттар Прадеш мужид гарч, олон хүний аминд хүрээд буй нууцлаг өвчнийг эмч нар денге хэмээх өвчин байх хэмээн таамаглаж байгаа аж. Мужийн эрүүл мэндийн асуудал эрхэлсэн сайд Амит Мохан орон нутгийн хэвлэлд өгсөн ярилцлагадаа энэ талаар өгүүлжээ.

Өвчтөнд өндөр халуурахаас гадна толгой өвдөх, шингэн алдах, дотор муухайрах, гар, хөлийн орчимд тууралт гарах зэрэг шинж тэмдэг илэрдэг байна. Одоогоо энэ өвчний улмаас 50 хүн нас барсны ихэнх нь хүүхэд байгаа бөгөөд мужийн зургаан дүүргийн хэдэн зуун хүн хэвтэн эмчлүүлж байгаа ажээ. Дээрх хүмүүсээс ковид  19 цар тахлын шинжилгээ авсан ч бүгд сөрөг гарсан байна.

Ковид 19 цар тахлын давалгааг дөнгөж даваад бага, багаар өндийж асан тус улсын хувьд энэ шинэ өвчин ноцтой уршиг тарих вий гэсэн болгоомжлол үүсээд байгаа юм. Эмч нар уг өвчнийг шумуулаар дамждаг вирусийн гаралтай денге хэмээх халдварт өвчин хэмээн таамаглаж байгаа ажээ. Нөхцөл байдал ийм ноцтой байхад эрх баригчдын зүгээ анхаарал хандуулахгүй байгаад иргэд дургүйцэж байгаа юм байна.