АНУ цар тахлын вакцины хоёр тун хийлгэсэн иргэдэдээ нэмэлт гуравдугаар тунг хийхээр болжээ. Цагаан ордноос өчигдөр энэ талаар зарлалаа.

Гурав дахь тунг хоёр дахь тунг хийлгэснээс хойш найман сарын дараа хийх юм байна. Энэ нь тус улсад гурав дахь тунгийн дархлаажуулалт есдүгээр сарын дундуур эхэлнэ гэсэн үг аж. Хүнс, эмийн агентлагийн зөвшөөрөл тэр үеэр гарч таарах гэнэ.

Албан ёсны мэдэгдлийг Цагаан ордон энэ долоо хоногтоо хийх бөгөөд энэ нь коронавируст цар тахал эндеми буюу нэг газартаа байнга давтагдан гарах шинж чанартай болсон гэдгийг хүлээн зөвшөөрч байгааг илэрхийлж байгаа бөгөөд цаашлаад эрдэмтэд улирлын томуу гэдэг шиг улирлын коронавирус гэж бий болж байгааг албан ёсоор зарлах алхмаар үргэлжлэх юм байна. Тодруулбал, цар тахал бүрэн арилахгүй бөгөөд хувьсан өөрчлөгдөх вирус бүрт тохирох эм, эмийн бодисыг олох эрэл үргэлжилсээр байх ажээ.

Оросын шууд хөрөнгө оруулалтын сан хэмээх байгууллага энэ сарын 11-ний өдөр “Пфайзер” компанид хандаж, Sputnik Light эмийг коронавируст халдварын нөлөөг бууруулах гурав дахь тун болгож ашиглах санал тавьжээ. Вакцинжуулалтын хувиар дэлхийд дээгүүрт бичигдэж буй  АНУ, Израиль зэрэг улсад халдварын тохиолдлууд нэмэгдэж байгаа нь вакцинд үр дүнг нь дээшлүүлэгч өдөөгч дутагдаж байгаагийн шинж юм байна.