Афганистаны нийслэл Кабул хот талибуудын хяналтад оржээ. Талибан бүлэглэлийн дайчид нийслэлийн ойролцоо цэргийн хүч хуралдуулж, өнгөрсөн шөнө хот руу дайран орсон бөгөөд ширүүн тулалдаан болно гэж хүлээж байсан ч ямар ч эсэргүүцэлгүй шахам эзэлж авчээ. Талибууд Ерөнхийлөгчийн ордныг ч хяналтдаа авсан байна. Афганистаны Ерөнхийлөгч Ашраф Гани эх орноо орхин гарчээ.  

Афганистанаас цэргээ гаргах Д.Трампын бодлогыг үргэлжлүүлнэ гэдгээ зарлах үедээ АНУ-ын Ерөнхийлөгч Жо Байден “Талибан бүлэглэл Афганистаныг бүхэлд нь хяналтдаа авна гэдэг үнэмшил багатай” хэмээн ярьж байсан бол сар гаруйхны дараа ийнхүү Афганистаны ихэнх нутагт талибууд хяналтаа тогтоогоод байна.

Цөөн үгээр...

-Ерөнхийлөгч Ашраф Гани эх орноо орхин дүрвэсэн. Түүнийг Тажикистан, Узбекистаны аль нэгэнд очсон хэмээн таамаглаж байна.

-Талибууд нийслэлийг эзэлж авах үедээ эсэргүүцэлтэй бараг тулгараагүй гэж дээр өгүүлсэн. Гэхдээ Кабулын нисэх буудлыг эзэлж авах үеэр барахан хэмжээний тулаан болсон бөгөөд гэрчүүдийн ярьж байгаагаар, тулааны үеэр энгийн иргэд амиа алджээ.

-Талибан бүлэглэлийн удирдагчид дайралтыг эхлүүлэхийн өмнө хүчирхийллээс аль болох зайлсхийж, явахыг хүсч байгаа гаднын хүмүүсийг бүгдийг нь саадгүй явуулна хэмээн амалж байв.