Талибууд иргэний Засгийн газрын эсрэг цахилгаан дайн эхлүүлж, гол гол хотуудыг эзлэн авсаар байна. Тус улсын хоёр дахь том хот Кандагар саяхан босогчдын хяналтад оржээ. Талибан бүлэглэл одоогийн байдлаар Афганистаны хойд нутгийн ихэнхийг мэдэлдээ аваад байгаа бөгөөд мужийн нийслэлүүдийн 1/3-ийг хэдийнэ эзэлжээ. Талибын дайчдын харгислалаас зугтан дүрвэгсдийн тоо хэдэн арван мянгаар тоологдож байгаа бол амиа алдагсдын тоо мянгаар тоологдож байна.

Дотоодын дүрвэгчдийн ихэнх нь нийслэл Кабулд очсон ба тэнд түр зуурын хуаран үүсгэн толгой хоргодож байгаа аж.

Доналд Трампыг Афганистанаас цэргээ татах шийдвэр гаргах үед “Цэрэг гармагц талибууд төрийн эрх мэдлийг булааж авна” гэж анхааруулах нэг хэсэг байсан. Тэдний зөв байжээ гэдэг нь ийнхүү батлагдаж байна. Нөгөө талаар, Жо Байден Ерөнхийлөгч болсон тул Афганистанаас цэргээ татахгүй, харин ч нэмнэ гэсэн таамаг ч голоо барьж бууж байна. Талибууд дайралт эхлүүлсний дараа Их Британи улс  600 цэргийг Афганистан руу илгээхээр шийдвэрлэсэн. Гэхдээ эдгээр цэргүүд талибуудын эсрэг байлдааны ажиллагаа явуулахгүй, тус улсад суугаа өөрийн улсын иргэдээ татаж авах,  дүрвэгсдэд туслах ажлыг гүйцэтгэх зорилготой аж. Афганистанд Их Британийн 4000 гаруй иргэн амьдардаг юм байна.