Хөвсгөл аймаг баавгайн халдлагаас ард иргэдээ хамгаалах, сэргийлэх ажилд 26 сая төгрөг зарцуулахаар болжээ. Тус аймагт ойн зэрлэг баавгай төв суурин газар руу орж ирэх, айлын хот руу халдах тохиолдол тасрахгүй гарч байгаа юм. Хамгийн сүүлд,  өнгөрсөн амралтын өдрүүдэд Түнэл сумын малчин айлд баавгайн бамбарууш орж ирсэн байна. Нутгийн залуус  баавгайг бугуйлдан барьж авч Хөвсгөл аймгийн Байгаль орчин аялал жуулчлалын газрын  Ажлын хэсэгт хүлээлгэн өгчээ. Тэрхүү бамбаруушийг энэ өвөл бие даан амьдрах чадваргүй гэж үзэж Улсын хамгаалалттай газарт аваачиж тэжээхээр болсон байна.