ТОКИО. /Kyodo/. Японы Ерөнхий сайд Кишида Фүмио НАТО-гийн дээд хэмжээний уулзалтад оролцохоор Литвад, Европын Холбооны удирдагчидтай уулзахаар Бельгид ирэх долоодугаар сарын 11-нээс дөрвөн өдрийн айлчлал хийнэ гэдгээ мягмар гарагт мэдэгдэв.

Тэрбээр мөн Ойрхи Дорнодын орнуудтай эдийн засаг, аюулгүй байдлын харилцаагаа гүнзгийрүүлэх зорилгоор ирэх сарын сүүлээр Саудын Араб, АНЭУ, Катарт айлчлахаар төлөвлөж буйгаа Либерал Ардчилсан намын удирдах зөвлөлийн гишүүдтэй уулзах үеэрээ хэлжээ.

Испанид 2022 онд болсон НАТО-гийн дээд хэмжээнд уулзалтад оролцсоноор ийм уулзалтад оролцсон Японы анхны удирдагч болсон К.Фүмио энэ жилийн уулзалтад мөн оролцох гэж буй нь энэ юм. Азийн аюулгүй байдалд учирч болзошгүй аюул заналд хариу арга хэмжээ авах зорилтын хүрээнд НАТО Токиод холбоо тогтоох оффисоо нээхээр хэлэлцэж байгаа билээ.

Японы Ерөнхий сайд Ойрхи Дорнодод долоодугаар сарын 16-наас хийх дөрвөн өдрийн айлчлалынхаа үеэр “байгалийн нөөц баялгийн дипломат ажиллагааг” бэхжүүлэхэд бэлэн байгаагаа илэрхийлжээ. Япон улс нь түүхий газрын тос зэрэг олборлодог түлшний импортоос ихээхэн хамааралтай орон юм. 

Эх сурвалж: "Монцамэ" агентлаг