Олон нийтийн сүлжээгээр "Хийдэд шавилан суралцаж буй хүүхдүүд бэлгийн дарамтад өртдөг үү” гэх мэдээл тархаад буй. 

Уг асуудлын талаар Гандантэгчэнлин хийдээс өнөөдөр хэвлэлийн хурал зохион байгуулсан юм. 

Түүний дараагаар тус асуудлаар Гандантэгчэнлин хийдийн үүдэнд "Далд хүн" ТББ-аас мэдээлэл хийлээ. 

“Далд хүн” ТББ-ын тэргүүн Б.Ууганбаяр “Эцэг эх, асран хамгаалагч нар хүүхдээ үл хайхрах хүчирхийлэлд оруулж байна. Өөрөө амьдралын боломжгүйгээс болж хүүхдээ хаа хамаагүй газар орхиж явснаас болж тухайн хүүхэд хүчирхийлэлд өртөх нөхцөл бүрдэж байна.

Төр, сүм хийдийн харилцааны тухай хуульд заасны дагуу тухайн шашны үйл ажиллагаа явуулж байгаа байгууллага хүүхэд хамгааллын үйлчилгээг үзүүлэх мөн Хөдөлмөрийн тухай хуулийн 43-р зүйлд заасны дагуу эцэг эхийн зөвлөл Хүүхэд хамгааллын тухай хуультай холбогдуулсан дотоод дүрэм журмыг бий болгосон байх ёстой.

Эдгээр дүрэм журам байхгүй байгаагийн илрэл нь энэ хэрэг гэж харж байна” гэлээ.

Тус төрийн бус байгууллагаас Гандантэгчэнлин хийдэд албан бичиг хүргүүлжээ.

Тус албан бичгийг товчлон хүргэвэл “Сүүлийн үед Гандантэгчэнлин хийдэд 13 настай хүү бэлгийн ёс бус үйлдэлд хохирсон асуудал үүссэн. Үүнтэй холбогдуулан Гандантэгчэнлин хийдэд Хүүхдийн эрхийн тухай, Гэр бүлийн хүчирхийллийн тухай, Хүүхэд хамгааллын тухай, Хүүхдийн эрхийн тухай конвенц зэрэг хууль тогтоомжуудад үндэслэн дараах шаардлагуудыг хүргүүлж байна.

Гандантэгчэнлин хийдэд байрлах шашны сургууль, дотуур байрны дотоод дүрэм журам, танилцуулга, эцэг эх, асран хамгаалагчтай хийсэн гэрээг ил болгож танилцуулах, хэрэв тус гэрээг хийгээгүй бол яагаад хийгээгүй гэдгээ тайлбарлах” гэжээ.