Сургуулийн өмнөх болон Ерөнхий боловсролын тухай хуулийн анхны хэлэлцүүлгийг явуулж байна. Боловсролд хүүхэд бүр тэгш хамрагдах, суралцагчийн дийлэнх нь хүн амын өөр үндэстний болон хэлний цөөн байх тохиолдолд сургалтыг хос хэлээр зохион байгуулах, ахлах сургуулийг сургалтын хөтөлбөрөөс нь хамаарч төрөлжүүлэх, сургуулийн өмнөх боловсролд 2-5 настай хүүхэд хамрагдах бөгөөд таван настай хүүхдийг заавал хамруулах зэрэг заалтыг хуулийн төсөлд тусгажээ. 

Үндсэн хуулийн цэцийн дөрөвдүгээр дүгнэлтийг УИХ хэлэлцэж байна. 

"Онцгой албан татварын тухай хуулийн 4 дүгээр зүйлийн 4.1 дэх хэсгийн 4.1.5 дахь заалтад "газрын тосны үйлдвэрлэлийн дайвар бүтээгдэхүүн, керосин." гэж заасан нь Монгол Улсын Үндсэн хуулийн Нэгдүгээр зүйлийн 2 дахь хэсгийн "... тэгш байдал, ... хууль дээдлэх нь төрийн үйл ажиллагааны үндсэн зарчим мөн." гэж заасныг зөрчсөн байна гэснийг хүлээн зөвшөөрөх нь зүйтэй" гэсэн саналын томьёоллоор санал хураахад, байнгын хорооны хуралдаанд оролцсон гишүүдийн 60  хувь нь дэмжжээ. 

Мөн "Онцгой албан татварын тухай хуулийн 4 дүгээр зүйлийн 4.1 дэх хэсгийн 4.1.5 дахь заалтад "газрын тосны үйлдвэрлэлийн дайвар бүтээгдэхүүн, керосин." гэж заасан нь Монгол Улсын Үндсэн хуулийн Тавдугаар зүйлийн 4 дэх хэсгийн "Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжлийг хангах зорилгод нийцүүлэн эдийн засгийг зохицуулна” гэж заасныг зөрчсөн байна гэснийг хүлээн зөвшөөрөх нь зүйтэй" гэсэн саналын томьёоллоор санал хураахад, байнгын хорооны хуралдаанд оролцсон гишүүдийн олонх дэмжсэн байна.