Засгийн газрын хэрэг эрхлэх газрын дарга хувийн хэвшилтэй хийсэн уулзалтын үр дүнд шийдвэрлэхээр болсон асуудлуудын тухай ЦХХХ-ны сайд Ц.Учрал мэдээлэл өглөө. 

Тэрбээр "Төр хувийн хэвшлээр гүйцэлдүүлэх программ хангамжийн чиглэлийн ажлын жагсаалтыг батлуулахаар болсон. Үүний үр дүнд төр цаашдаа систем хөгжүүлэхгүй. Энэ нь хувийн хэвшлийн хийж буй ажлыг давхардуулж хийдэг биш зөвхөн бодлогоо тодорхойлдог болно гэсэн үг. 

Уг ажлын хүрээнд mindgolia.mn программ хангамжийн их дэлгүүрийг байгуулаад байгаа бөгөөд 380 гаруй бүтээгдэхүүн байршжээ. 

Жил тутам төр 950 тэрбум төгрөгийн программ хангамжийн худалдан авалтыг хийдэг. Төр том худалдан авагч хэвээр байдаг ч системүүд нь хоорондоо холбогддоггүй.

Үүнийг хувийн хэвшил mindgolia дээр тавьж төр худалдан авдаг эрх зүйн боломжийг нээх үүднээс төрийн худалдан авах ажиллагааны газар mindgolia.mn, e-tender.mn хоёрыг холбох чиглэлийг өгсөн. 

Цаашдаа компани, аж ахуйн нэгжүүд mindgolia.mn дээр өөрсдийн хөгжүүлсэн системүүдээ тавьж түүнийг нь төр худалдан авдаг болно. 

Мөн хувийн хэвшлүүдийн зүгээс танилцуулсан 10 жилийн төлөвлөгөөн дээр харилцаа холбооны салбар 1.6 их наяд төгрөгийн борлуулалт хийдэг том салбар хэдий ч мэдээлэл технологийн салбар төдийлөн борлуулалт хийж чадахгүй байна" гэлээ. 

Мэдээлэл технологийн салбарын борлуулалт дотоодын нийт бүтээгдэхүүний 0.3 хувьд ч хүрэхгүй байгаа учраас программ хангамж үйлдвэрлэгч нарыг дэмжих эрхзүйн орчныг боловсронгуй болгох чиглэлээр хуулийн шинэчлэл хийхээр ажиллаж байгаа аж.