Санхүүгийн зохицуулах хорооны Үнэт цаасны зах зээлийн бодлогын зөвлөлийн ээлжит хурал өнөөдөр боллоо.

Хуралдаанаар хөрөнгийн зах зээлийн өнөөгийн нөхцөл байдал, банкны реформ, уул уурхайн бүтээгдэхүүний биржийн зохицуулалтын орчин болон нүүрсний цахим арилжааны талаар хэлэлцэв. Тодруулбал бодлогын зөвлөлөөс банкны реформын хүрээнд системийн нөлөө бүхий банкууд нээлттэй хувьцаат компани болсноор үнэт цаасны арилжаа, хөрвөх чадвар, зах зээлийн үнэлгээг нэмэгдүүлэхэд чухал нөлөө үзүүлж байгаа талаар мөн уул уурхайн бүтээгдэхүүний биржийн тухай хуулийн хэрэгжилтийг хангуулах хүрээнд хийгдэж буй арга хэмжээний талаар санал солилцлоо.

Мөн хуралдаанаар СЭЗИС-аас санхүүгийн зах зээл дээр хийсэн сүүлийн үеийн судалгааны үр дүнг танилцуулж цаашид анхаарах асуудлаар харилцан ярилцлаа. Түүнчлэн дараагийн хуралдаанаар үнэт цаасны арилжаа болон төлбөр тооцооны шимтгэл, хураамжийн хэмжээг бууруулахтай холбоотой асуудал, үнэт цаасны өмчлөх эрх шилжүүлэхтэй холбоотой зохицуулалтын талаар хэлэлцэхээр тогтов.
 

Үнэт цаасны зах зээлийн бодлогын зөвлөлийн даргаар Санхүүгийн зохицуулах хорооны дэд дарга Т.Цэрэнбадрал, зөвлөлийн гишүүдээр Санхүүгийн зохицуулах хорооны Үнэт цаасны газрын дарга Б.Дөлгөөн, “Монголын хөрөнгийн бирж” ТӨХК-ийн гүйцэтгэх захирал Х.Алтай, “Монголын үнэт цаасны клирингийн төв” ХХК-ийн гүйцэтгэх захирал О.Эрдэнэгэрэл,  “Улаанбаатар үнэт цаасны бирж” ХК-ийн гүйцэтгэх захирал Б.Гантулга, салбарын мэргэжлийн холбоод болон компаниудын удирдлагууд, МУИС, СЭЗИС-ийн төлөөлөл тус тус ажиллаж байна.

Эх сурвалж: Санхүүгийн зохицуулах хороо