УИХ-ын гишүүн П.Анужин Нийгмийн даатгалын багц хуулийн төслийн талаар мэдээлэл өглөө. 

Тэрбээр "Иргэдийн дунд тэтгэвэртэй холбоотой асуудал яригдаж байна. Дараалсан таван жилийн дунджаар тэтгэвэр тогтоох заалтыг хуулийн төсөлд оруулахдаа төлөх дээд хязгаарыг нь тогтоосон. Хөдөлмөрийн хөлсний доод хэмжээг долоо дахин өсгөсөн байдлаар сайн дураараа даатгуулагч шимтгэл төлөх юм. Хуулийн төсөлд дараалсан долоон жилийг таван жил болгох заалтыг тусгасан.

Иргэдийн дунд долоон жил таван жил болгоход бидний төлсөн зөрүүг барагдуулах уу гэдэг асуудал гарч байна. Энэхүү зөрүүг арилгана. Тэтгэврийн сангийн орлого жил бүр буурсаар байгаа тул нэмэгдүүлэх шаардлагатай.

Монгол Улсад 223 мянга орчим малчин байна. Малчдын 20 гаруй хувь нь нийгмийн даатгалын шимтгэл төлж, хамрагдалт бага хувьтай байгаа. Хэрвээ малчин нийгмийн даатгалын шимтгэлээ хөдөлмөрийн хөлсний доод хэмжээгээр төлбөл улсаас 50 хувийг нь төлөх заалт хуулийн төсөлд орсон. Энэ нь нэг талдаа нийгмийн даатгалын сангийн бүрдүүлэлтийг дэмжихэд чухал юм" гэдгийг хэллээ.