-Томилолт өвөрлөсөн 76 гишүүн тойргууддаа ажиллана-

Үндсэн хуульд нэмэлт өөрчлөлт оруулах тухай хуулийн төсөлд иргэдээс санал авах ажил өнөөдрөөс эхэлж байна. ҮХНӨ хийхэд ард нийтийн санал асуулга явуулах ёстой ч энэ удаад өөр процессоор буюу төлөөллөөр нь дамжуулж санал авахаар болоод буй юм. Энэ дагуу УИХ-аас гишүүдэд томилолт бичиж өгсөн бөгөөд өнөөдрөөс уулзалтууд эхэлж байна. 

УИХ-ын чуулганы баасан гарагийн хуралдаанаар Засгийн газраас санаачилсан Үндсэн хуульд оруулах нэмэлт өөрчлөлт оруулах тухай хуулийн төсөл, Монгол Улсын Үндсэн хуульд оруулсан өөрчлөлтийг дагаж мөрдөхөд шилжих журмын тухай хуулийг хэлэлцээд,  чуулганы нэгдсэн хуралдаанаар хэлэлцэх шийдвэр гаргасан. Санал хураахад 59 гишүүн дэмжиж, 96.7 хувийн саналаар дэмжигдсэн тул анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүлээд байгаа юм. Төсөлд пропорциональ тогтолцоо, УИХ-ын гишүүдийн тоо, пропорциональ, мажоритар мандатын харьцаа гэсэн гурван асуудлаар санал өгөх боломжтой.