Авлигын хэргээр шалгагдаж байхдаа оргон зайлсан Т.Бадамжунайг өнөөдөр өглөө Филиппинээс Монголд авчирч, улмаар онгоцноос буусан даруйд баривчлах тогтоолыг нь танилцуулаад шууд саатуулжээ.  

Дон Жунай, Магас Жунай гэх зэрэг хочтой Т.Бадамжунай нь хотын Ерөнхий менежер байхаасаа авлига албан тушаалын хэрэгт сэрдэгдэж ирсэн ч УИХ-ын гишүүн, Засгийн газрын сайд хүртэл дэвшин ажилласан байдаг. Тэрбээр хуулийн байгууллагад шалгагдаж байхдаа 2018 онд оргон зайлснаасаа хойш Филиппин улсад амьдарч байжээ. 

Т.Бадамжунайг суулгасан онгоц "Чингис хаан" Олон улсын нисэх буудалд газардаж, баривчлан саатуулсны дараа Хууль зүй, дотоод хэргийн сайд Х.Нямбаатар түүнийг эх оронд нь авчрах, улмаар баривчлан саатуулах боломж хэрхэн бүрдсэн талаар мэдээлэл өгсөн. Түүний хэлснээр, БНСУ-д хуралдсан Энэтхэг, Номхон далайн бүсийн орнуудын ардчиллын уулзалт чухал нөлөө үзүүлжээ. Чуулганд оролцогч улс орнууд "Авлигатай тэмцэх" чиглэлээр бие биедээ туслалцаа үзүүлэх асуудлаар салбар хуралдаан зохион байгуулсан бөгөөд энэ үеэр Гадаад хэргийн болон хууль зүйн сайд нарын түвшинд харилцан дэмжлэг үзүүлэх тухайд уулзалт болсон аж. Хуулийнхан энэ яриа, тохиролцооныхоо дагуу Филиппин улсад очиж, харилцан туслалцах гэрээгээр хамтран ажиллах, улмаар визний нь хугацааг дуусгах, дансыг нь царцаах хүсэлт өгөн асуудлыг шийджээ. Х.Нямбаатар сайдын хэлснээр, Т.Бадамжунай өөрөө Монгол руу ирэхээс татгалзах зүйлгүй гэсэн гэнэ.