Эрх баригчдын “хатгаас”, дотоод тэмцлээсээ болоод хоёр хуваагдсан Ардчилсан нам 2024 оны сонгуулиас өмнө амжиж цэгцрэх хүнд даалгавартай болоод буй билээ. Үндсэн хуулийн нэмэлт өөрчлөлт хийгдсэний дараа сонгуулийг наашлуулчих ч хувилбар бий. Ингэвэл хугацаа улам л богиносно. Тиймээс ардчиллыг дэмжигчид лидер гэгдсэн улстөрчдөөсөө хурдхан шиг нэгдэж нягтрахыг шаардаж буй. Нэгдэх үйл явц ч эхэлсэн. Гэхдээ дэмжигчид ч тэр, нөлөө бүхий улстөрчид нь ч тэр яг ижил нэг зүйлийг хүсэж байгаа нь, өмнөх оролдлого бүрийг нь амжилтгүй болгосон Х.Баттулга, С.Эрдэнэ нарыг энэ удаагийн үйл явцад оролцуулахгүй байх явдал аж.

Тэдний хүслээр болж, энэ хоёр хүн шууд тоглооноос гарна ч гэж юу байх вэ. Гэхдээ л тодорхой хэмжээнд ч гэсэн бодитойгоор үйл явцын гадна гаргах боломж гарах болов уу хэмээн найдаж байна.

Иргэдийн дэмжлэгийг авч чадах эсэх буюу сонгуульд амжилттай орж чадах эсэх, ерөөс Ардчилсан нам цаашид орших эсэх гэсэн том эрх ашиг энэ хоёр хүнээс шалтгаалах болчихоод байгаа тул нөлөөтэй зүтгэлтнүүд нь ч үүнд нухацтай хандаж эхэлсэн байна. Өөрөөр хэлбэл, эвлэлдэж нэгдэх шинэ үйл явцаар Х.Баттулга, С.Эрдэнийн хүмүүс жийгдэж, хүчгүйдэх магадлал өндөр байгаа аж.