Монгол Улсын Засгийн газраас орон нутгийн буюу “Тавантолгой” ХК-д бүрэн эрхт төлөөлөгч томилж, улмаар төрийн мэдэлд авахаар ажлын хэсэг байгуулсан билээ. Тэгвэл энэ шийдвэр “Засгийн газар нүүрсний шүгэл үлээсний гол зорилго нь ердөө жижиг Таван толгойг төрийн мэдэлд авах, Ерөнхийлөгч асан Х.Баттулгыг баривчлах явдал байсан юм биш үү“ гэсэн эргэлзээг үүсгэжээ.

Учир нь Тавантолгойн бүлэг ордын нэг болох Ухаа худагт жижиг Тавантолгойтой ижил хувийн өмчийн “Энержи ресурс” компани олборлолт явуулдаг юм. “Эм Си Эс” группийн мэдэлд байдаг тус компанийн ард Сү.Батболд тэргүүтэй МАН, АН-ын улстөрчид байдаг гэх хардлага ч бий. Тиймээс “Засгийн газар хэрвээ жижиг Тавантолгойг төрд авч байгаа бол Ухаа худагийг ч бас авах ёстой. Тэгж байж тэмцэлд нь үнэмшье” гэх яриа иргэдийн дунд тараад байгаа аж.