Засгийн газрын өнөөдрийн хуралдаанаар Төсвийн тодотголд орсон байсан “Нийгмийн даатгалын шимтгэлээс даатгуулагчийн төлсөн дүнгийн 50 хувийг буцаан олгох тухай” заалтыг өөрчилжээ. Уг буцаалтыг цалингийн хэмжээгээс нь хамаарч олгохоор болсон байна. Тодруулбал, сарын 1 сая төгрөгөөс дээш орлоготой иргэдийн НДШ-ийн 50 хувийг буцааж олгохгүй юм байна. Энэ талаар ХНХ-ны сайд А.Ариунзаяа мэдээлэл өглөө. Тэрээр "Зарим байгууллагын ажилчдад буцаан олголт өгөхгүй тухай анх яригдсан. Гэвч өнгөрсөн хугацаанд маш олон санал ирсэн. Тиймээс байгууллагаар нь бус цалингийн хэмжээгээр нь хязгаарлах нь зөв гэж үзсэн. Ингээд 1 сая төгрөгөөр хязгаарлахаар болсон. Өөрөөр хэлбэл, 1 сая төгрөгөөс бага цалинтай иргэдийн НДШ-ийн 50 хувийг буцаан олгоно гэх агуулгаар хуулийн төслийг өргөн барилаа. Ингэснээр албан журмаар НДШ төлдөг 715 мянган хүн хамрагдах юм байна. Харин сайн дураараа НДШ төлдөг 147 мянган хүн хамрагдах юм байна. Үүнд төсвөөс 172 тэрбум төгрөг зарцуулна" гэсэн юм.