Тамхины тухай хуулийн шинэчилсэн найруулгын төслийг тойрсон ашиг сонирхлын холбоо, улс төрийн нөлөөллийн талаарх асуудал олон нийтийн анхаарлыг татсаар байна.

Тодруулбал, ажлын хэсгээс гааны амтыг хориглохгүй байх санал оруулж ирснийг УИХ-ын гишүүн Ө.Шижир дэмжээгүй гэх мэдээлэл гарсан бөгөөд өнгөрсөн есдүгээр сард УИХ-ын гишүүн Номинчимэг тамхины компаниудын төлөөлөлтэй уулзах үеэр “Волтам” компани ийм санал гаргаж байсан талаар дурдагдаж байв.

Мөн 2025 оны арваннэгдүгээр сарын 25-нд “Зууны мэдээ” сонинд нийтлэгдсэн мэдээлэлд одоогийн “Волтам” ХХК-ийн ТУЗ-ийн гишүүн Б.Баттулга нь Ерөнхийлөгч асан Х.Баттулгыг төрийн тэргүүнээр ажиллаж байх үед Хөгжлийн банкны ТУЗ-д ажиллаж байсан талаар мэдээлжээ.

Нөгөө талаас, Тамхины тухай хуулийн төслийг санаачлагч ажлын хэсгээс гааны амтыг хориглохгүй байх санал оруулж ирснийг дэмжээгүй УИХ-ын гишүүн Ө.Шижир нь өмнө нь Ерөнхийлөгчийн Тамгын газарт ажиллаж байсан бөгөөд Х.Баттулгын ойрын хүрээний хүн гэж улс төрийн хүрээнд яригддаг.