Хятадын Гадаад Харилцааны Яам Америкийн цэргийн аж үйлдвэрийн аж ахуйн нэгжүүд болон тэдний ахлах менежерүүдийн эсрэг хориг арга хэмжээ авах тухай шийдвэрээ 12-р сарын 5-нд зарлажээ. 

Хятадын Төв телевиз энэ тухай: " Америк Хятадын Тайваньд зэвсэг нийлүүлэхээ дахин зарласан. Энэ нь Нэг Хятад зарчим болон Хятад, Америкийн гурван хамтарсан мэдэгдлийг ноцтой зөрчиж байна. Улмаар Хятадын дотоод хэрэгт бүдүүлгээр хөндлөнгөөс оролцож, Хятадын бүрэн эрх, нутаг дэвсгэрийн бүрэн бүтэн байдлыг хохироож байна. БНХАУ-ын Гадаадын хоригийн эсрэг хуулийн 3, 4, 5, 6, 9, 15-р зүйлд заасны дагуу Хятад улс Америкийн цэргийн аж үйлдвэрийн аж ахуйн нэгжүүд болон ахлах менежерүүдийн эсрэг хариу арга хэмжээг авахаар шийдвэрлэжээ. 

Тодруулбал,Телида Браун Инжиниринг компани, BRINC дрон компани, Шуурхай нислэг компани зэрэг 13 аж ахуйн нэгжийн Хятад улс дахь хөдлөх, үл хөдлөх хөрөнгө болон бусад төрлийн өмчийг царцаана. Мөн Хятадын дотоодын байгууллага нэгж, хувь хүнтэй холбогдох гүйлгээ хийх, хамтран ажиллахыг хориглоно. 

Хоёрдугаарт, Рэйтеон компанийн Тэнгисийн цэргийн хүчний стратегийн бизнесийн албаны ерөнхийлөгч Барбара Боргонови, дэд ерөнхийлөгч Жералд Хубер зэрэг 6 ахлах менежерийн Хятадын нутаг дэвсгэрт байгаа хөдлөх, үл хөдлөх болон бусад төрлийн эд хөрөнгийг царцаана. Мөн Хятадын нутаг дэвсгэрт байгаа ямар нэгэн байгууллага нэгж, хувь хүнтэй гүйгээ хийх, хамтын ажиллагаа хийхийг хориглоно. Мөн дээрх 6 хүнд Хонконг, Макаог багтаасан Хятадад ирэх виз олгохгүй бөгөөд Хятадын хилээр нэвтрэхийг хориглоно." гэжээ.

Дээрх шийдвэрийг 2024 оны 12-р сарын 5-аас эхлэн хэрэгжүүлнэ.