АНУ, Ираны сөргөлдөөний улмаас газрын тосны үнэ дахин нэмэгдлээ

Ойрх Дорнодод нөхцөл байдал дахин хурцдаж, стратегийн чухал ач холбогдолтой Ормузын хоолойд газрын тос тээвэрлэгч хөлөг онгоцууд халдлагад өртсөний улмаас дэлхийн зах зээл дээр түүхий эдийн үнэ эргэн өсөх хандлагатай боллоо.

Олон улсын хэвлэлүүдийн мэдээлснээр, Ираны тал Бахрейн дэх Америкийн цэргийн бааз болон Ормузын хоолойгоор зорчиж буй танкерууд руу пуужин харвасны хариуд АНУ-ын зэвсэгт хүчин Ираны пуужин хөөргөх төхөөрөмжүүд болон Кешм аралд агаарын цохилт өгчээ. Исламын хувьсгалын харуулуудын корпусын мэдээллээр зөвхөн сүүлийн нэг долоо хоногийн дотор тус хоолойд нийт зургаан газрын тос тээвэрлэгч хөлөг онгоц дэлбэрээд байна. Мөн АНУ Персийн булангийн бүс нутагт тэнгисийн болон агаарын цэргийн хүчээ эрчимтэй зузаатгаж эхэлсэн нь нийлүүлэлтийн сүлжээ тасалдах болгоомжлолыг улам нэмэгдүүлэв.

Үүний зэрэгцээ Йемений хуситууд Саудын Арабын газрын тос дамжуулах хоолойг онилж буй ч Персийн булангийн орнуудын экспорт болон АНУ-ын түүхий нефтийн нөөц нэмэгдсэн үзүүлэлттэй байгаа нь үнийн огцом хөөрөгдлийг тодорхой хэмжээнд хязгаарлаж байна. Зах зээлийн сүүлийн үеийн арилжаагаар Брент төрлийн газрын тосны ханш баррель нь 93-96 ам.долларын хооронд, харин WTI төрлийн газрын тос 86 ам.доллар орчимд хэлбэлзэж байна.


АНУ, Ираны сөргөлдөөний улмаас газрын тосны үнэ дахин нэмэгдлээ
Сэтгэгдэл
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд chig.mn хариуцлага хүлээхгүй.

Нийт сэтгэгдэл: 0