Канцлер Олаф Шольц Украинд өчигдөр /2024.12.02/ гэнэтийн айлчлал хийх үеэрээ олон зуун сая еврогийн үнийн дүн бүхий цэргийн тусламж үзүүлэхээ мэдэгджээ. Энэхүү тусламжийг энэ онд багтаан Киевт илгээх төлөвтэй байгаа аж.

“Европ дахь Украиныг хамгийн хүчтэй дэмжигч нь Герман улс хэвээр байх болно гэдгийг би газар дээр нь тодорхой хэлмээр байна. Украинд он дуусахаас 650 сая еврогийн өртөг бүхий тусламж үзүүлнэ” гэж О.Шольц мэдэгджээ.

Герман бол Украины армийн томоохон хандивлагчдын тоонд багтдаг гэдгийг О.Шольц удаа дараа онцолсоор ирсэн ба гэхдээ зүүн төвийн үзэл баримтлалтай тэрбээр Киевт алсын тусгалтай пуужин илгээхээс татгалзаж байгаа юм. Энэ нь Германд ирэх хоёрдугаар сард болох ээлжит бус сонгуулийг өмнө тухайн асуудалд тун хашир хянамгай хандаж байгааг илэрхийлж байна.

Германы Канцлер Оросыг оролцуулсан Украины энх тайвны асуудлаарх хоёр дахь бага хурлыг зохион байгуулахыг сүүлийн хэдэн сарын турш уриалсаар иржээ. Оросын төлөөлөгчид оролцоогүй энх тайвны асуудлаарх анхны дээд хэмжээний уулзалт энэ оны зургаадугаар сард Швейцарьт болсон билээ.

Өнгөрсөн сард О.Шольц Оросын Ерөнхийлөгч Владимир Путинтэй анх удаа утсаар ярьсны дараа В.Зеленский хэлэхдээ, Путиныг тусгаарлах оролдлогыг сулруулсан гэж Канцлерыг шүүмжилж байв.