Аравдугаар сарын нэгний өдрөөс он дуустал үргэлжлэх цэрэг татлагаар зэвсэгт хүчиндээ 133,000 алба хаагч нэмэх зарлигийг ОХУ-ын ерөнхийлөгч Путин гаргасныг өчигдөр Кремлийн хэвлэлийн алба мэдээлжээ.

Алба хаах хугацаа өмнөхөөсөө өөрчлөгдөөгүй, хуулийн дагуу эрүүл мэндийн шаардлага хангасан 18-30 насны иргэд 12 сарын хугацаанд цэргийн алба хаахыг Оросын цэрэг татлагын хорооны тэргүүн, дэд адмирал Владимир Цимлянский тайлбарласан байна.

“Хугацаат цэргийн алба хаагчид шинэ бүс нутагт явуулж буй цэргийн тусгай ажиллагаанд оролцохгүйг би баталж байна” гэж тэр ярьсныг Российская Газета сонин мэдээлжээ.

Оросын эрх баригчид 2022 оны хоёрдугаар сард Украинд эхлүүлсэн эзлэн түрэмгийлэх дайнаа “цэргийн тусгай ажиллагаа” гэж нэрлэж байгаа.

Бас энэ дайны турш Украинаас эзэлж авсан газраа “шинэ бүс нутаг” гэж нэрлэдэг юм.

Өнгөрсөн сард Путин улсынхаа зэвсэгт хүчний нийт бие бүрэлдэхүүнийг 180 мянгаар нэмэгдүүлж, 1.5 саяд хүргэх зарлиг гаргаж байв.

Ингэснээр Оросын арми энэ үзүүлэлтээр дэлхийд зөвхөн Хятадын дараа хоёрдугаарт эрэмбэлэгддэг болох юм.

Эх сурвалж: Reuters