Бямба гарагт Израилийн арми Газын зурвас дахь Нусейрат дүрвэгчдийн хуарангаас Хамас зэвсэгт байгууллагад барьцаалагдсан дөрвөн хүнийг чөлөөлөх байлдааны тусгай ажиллагаа явуулсан юм.

Үүний үр дүнд 26 настай Ноа Аргамани, 22 настай Алмог Мэйр Ян, 27 настай Андрей Козлов, 41 настай Шломи Зив нарыг барьцаанаас чөлөөлж, Израильд авчирчээ.

Нова хөгжмийн наадамд оролцож байсан тэд өнгөрсөн оны аравдугаар сарын 7-нд Хамасын гишүүдэд барьцаалагдсан юм.

Агаарын цохилтоор дэмжүүлж, ширүүн буудалцааны дор болсон аврах ажиллагааны үеэр 100 хүрэхгүй тооны хүн амь үрэгдсэн тухай Израилийн зэвсэгт хүчин мэдээлж байв.

Харин Газын зурвас дахь Хамасын засаг захиргаа дээрх ажиллагааны улмаас 274 палестин хүн алагдсаны дотор эмэгтэйчүүд, хүүхдүүд олон байсныг сүүлд мэдээлжээ.

Өнгөрсөн Бямба гарагийг тэд Газын зурваст дайн эхэлсэн цагаас хойших хамгийн олон палестин хүн алагдсан өдрүүдийн нэг гэж дүгнэсэн байна.

Олон сарын турш барьцаанд байсан хүмүүсийг аварсан үйл явдлыг Израильд баяр хөөртэй хүлээж авсан бол олон улсын хамтын нийгэмлэг гэм зэмгүй хүмүүсийн амь насыг олноор нь золиосолсныг шүүмжилцгээжээ.

Тухайлбал Европын Холбооны гадаад бодлогын тэргүүн Жозеп Боррел “Энгийн иргэдийг дахин олноор нь хядсан тухай Газаас ирсэн мэдээ аймшигтай байна” гэж сошиал хуудсандаа бичээд уг үйлдлийг хамгийн хатуугаар буруушааж байгаагаа мэдэгдсэн юм.

Хоёр цаг үргэлжилсэн аврах ажиллагаа маш хүнд нөхцөлд хэрэгжиж, тусгай хүчний нэг алба хаагч шархадсан нь сүүлд эмнэлэгт нас барсныг Израилийн батлан хамгаалах яам мэдээлжээ.

 Аравдугаар сарын 7-ны өдөр Хамас зэвсэгт байгууллага Израилийн нутаг дэвсгэрт халдах үеэр 200 гаруй хүн хулгайлагдсанаас 120 орчим нь одоо болтол Газын зурваст барьцаанд байгаа гэсэн мэдээлэл бий.

Эх сурвалж: BBC