Япон улсын байгаль орчны яам өчигдөр буюу Лхагва гарагт агаарын хэт халалтын түгшүүр зарлах системийг нэвтрүүлжээ.

Тус улсад нэг жилд агаарын хэт халалтын улмаас амиа алдсан хүний тоо 1,000 давах болсон нь ийм арга хэмжээ авахад хүргэсэн байна.

Өнгөрсөн зуны дундаж агаарын температур албан ёсны хэмжилт эхэлсэн 1898 оноос хойших хамгийн дээд хэмжээнд хүрснийг Японы Цаг Уурын Байгууллага мэдээлсэн юм.

Агаарын хэт халалтын түгшүүрийг бүс нутаг тус бүрээр зарлах бөгөөд ингэсэн тохиолдолд урьдчилж бэлдсэн номын сан зэрэг нийтийн байгууламжуудыг “халуунаас хоргодох байр” болгон ашиглаж эхлэх юм байна.

Системийн идэвхтэй байх хугацаа аравдугаар сарын 23 хүртэл үргэлжлэх гэнэ.

Агаарын температур аюултай түвшинд хүрч халахыг байгаль орчны яам өмнөх өдрийнх нь 14:00 цагийн орчимд зарлаж, тухайн өдөр зохион байгуулагдах спортын уралдаан тэмцээн зэрэг эрсдэлтэй арга хэмжээнүүдийг хориглох ажээ.

Ингэхдээ тухайн мужийн нутаг дэвсгэрт байрлуулсан хяналтын станцуудын агаарын температур, чийгшил зэрэг хэмжилтүүд дээр үндэслэн гаргадаг “халалтын индекс” 35-ыг давсан тохиолдолд түгшүүр зарлаж байх юм байна.

Эх сурвалж: Kyodo News