Даваа гарагт АНУ-ын ерөнхийлөгч Жо Байден өөрийн хагас дамжуулагчийн үйлдвэрлэлийн хүчин чадлыг нэмэгдүүлэх зорилгоор Тайванийн TSMC компанид $11.6 тэрбумын санхүүжилт олгох шийдвэр гаргалаа.

TSMC (Taiwan Semiconductor Manufacturing Company) бол хагас дамжуулагчийн дэлхийн хамгийн том үйлдвэрлэгч юм.

Тус компани АНУ-ын гурав дахь үйлдвэрээ Финикс хотод 2028 онд нээх төлөвлөгөөг зарлаад байгаа. Уг үйлдвэрийг босгох зардал $65 тэрбум хүрсэн нь Аризона мужийн хувьд хамгийн том шууд гадаадын хөрөнгө оруулалт, АНУ-ын түүхэнд хамгийн том “greenfield” төсөл болж байна.

“Greenfield project” бол урьд өмнө ямар ч дэд бүтэц байгаагүй газарт бүхнийг эхнээс нь шинээр байгуулахыг хэлдэг нэр томьёо.

TSMC компанийн хөрөнгө оруулалтыг дэмжих зорилготой Байдены баталсан санхүүжилтийн $6.6 тэрбум нь буцалтгүй тусламж, $5 тэрбум нь хөнгөлөлттэй зээл юм.

Өмнөх хоёр үйлдвэртэйгээ нийлээд TSMC компани АНУ-д нийт  өндөр технологийн 6,000, угсралтын 20,000 ажлын байр бий болгохыг АНУ-ын Худалдааны Яам мэдээлжээ.

АНУ-ын засаг захиргаа 2030 онд дэлхийн орчин үеийн хагас дамжуулагч чипийн нийт хэрэгцээний 20 хувийг үйлдвэрлэдэг болж, энэ салбарт Хятадаас хамааралгүй болох зорилготой байгаа.

TSMC компанитай хамтран ажилласнаар энэ зорилгоо биелүүлнэ гэж үзэж байна.

Байдены шийдвэрийг зарласны дараа тус компанийн хувьцааны ханш 3.2 хувиар өсжээ.

Эх сурвалж: Business Insider