ОХУ-ын Калининград мужийн боомтод байрлаж байсан Балтийн тэнгисийн байлдааны хөлөгт амжилттай халдсан тухайгаа Украины цэргийн тагнуулын алба өчигдөр мэдээлжээ.

Хэрвээ энэ мэдээлэл батлагдвал Украины хорлон сүйтгэх ажиллагаа анх удаагаа Балтийн тэнгист хүрсэн тохиолдол болох юм.

Серпухов пуужин харвагч хөлөг онгоцон дээр гал гарсны улмаас хөлгийн харилцаа холбоо, автоматжуулалтын удирдлагын хэсэг бүрэн сүйрснийг тус улсын цэргийн тагнуулын алба Х хуудсандаа мэдээлжээ.

Дүрс бичлэгийг шинжилсэн мэргэжилтнүүд хөлгийн дотор талд хэн нэгэн гал түймэр тавьсан гэж дүгнэсэн байна.

Оросын төв хэвлэлүүд энэ талаар ямар нэг мэдээлэл өгөөгүй байна.

“Буян-М” ангиллын Серпухов хөлөг 2015 оноос хойш Балтийн тэнгисийн флотод ашиглагдаж байгаа ажээ.

Украины тусгай албад дайн эхэлснээс хойш Оросын Хар тэнгисийн флотын 20 гаруй хөлгийг устгасан гэдэг.

Харин хилээсээ алс хол оршдог Балтийн тэнгист халдлага явуулж байгаагүй юм.

2024 он гарснаас хойш Украины тал алсын тусгалын дроноор Оросын нутаг дэвсгэрийн гүнд явуулах ажиллагаагаа эрчимжүүлээд байгаа.

Өнгөрсөн долоо хоногт хилээсээ 1,200 км зайтай оршдог Татарстаны дрон угсралтын үйлдвэрт халдсан нь одоогоор хамгийн алс хол явуулсан ажиллагаа болоод байна.

Эх сурвалж: Kyev Post