ХАНОЙ, 2024 оны дөрөвдүгээр сарын 8 /OANA/. Вьетнамын Мэдээлэл, харилцаа холбооны яам энэ оны эцэс гэхэд Интернэт протоколын хувилбар 6 буюу IPv6-гийн хэрэглээг 65-80 хувьд хүргэж, Вьетнамыг IPv6 хаягжилтын хэрэглээгээр дэлхийд эхний 8-д оруулах зорилт тавиад байна.

Интернэт протоколын хамгийн сүүлийн хувилбар болох IPv6 хаягжилт руу шилжих нь интернэтийг хөгжүүлэх хаягийн нөөцийг хангах, зүйлсийн интернет, үүлэн тооцоолол, 5G/6G сүлжээ зэрэг шинэ үйлчилгээнүүдтэй холбогдоход чухал ач холбогдолтой гэж тус яам мэдэгджээ.

Саяхан батлагдсан IPv6-д шилжих төлөвлөгөөний дагуу энэ оны 12 дугаар сар гэхэд төрийн байгууллагуудын портал, төрийн үйлчилгээний порталуудын 90-100 хувь нь IPv6-г ашиглана. VNPT, Viettel, FPT Telecom, MobiFone компаниудын хувьд FTTH болон гар утасны хэрэглэгчдийн 95 хувь нь IPv6 ашигладаг байна. Харин байгууллагын сүлжээний IPv6 ашиглалтын түвшин 80 ба түүнээс дээш хувьтай байна.

Түүнчлэн интернэт үйлчилгээ үзүүлэгч, гар утасны үйлчилгээ, дата төв, үүлэн үйлчилгээ, дижитал контент зэрэг бусад бизнесүүдийн IPv6 ашиглалтын түвшнийг 50 хувь гэж тогтоожээ.

Вьетнам улсад IPv6-гийн хэрэглээний түвшин өнгөрсөн оны эцсээр 59 хувьтай байсан нь АСЕАН-ы орнуудын дунд хоёрдугаарт, дэлхийд есдүгээрт орж байна. Үндэсний интернетийн бүх чухал дэд бүтэц IPv6 хаягжилттай ажиллаж байгаа ажээ. Өнгөрсөн оны эцсийн байдлаар 76.4 сая гаруй өргөн зурвасын интернет хэрэглэгч IPv6-г ашиглаж байжээ.