Төв Америкийн Эль Сальвадор улс гадаадын мэргэжилтнүүдэд 5,000 паспорт “үнэ төлбөргүй” санал болгож байгааг тус улсын ерөнхийлөгч Найиб Букеле өнгөрсөн Бямба гарагт зарлажээ.

Тухайлбал эрдэмтэд, инженерүүд, эмч нар, уран бүтээлчид, философичид зэрэг мэргэжилтнүүдэд сонгуульд санал өгөх эрхтэй “иргэний бүрэн статус” олгохоо тэр амласан байна.

Бас нүүж ирэх мэргэжилтнүүдийн гэр бүл, эд хөрөнгийн шилжилт хөдөлгөөнтэй холбоотой зардлыг татвараас хөнгөлөх ажээ.

Уг арга хэмжээ нь Эль Сальвадор улсын эдийн засгийн өсөлтийг хангах, гадаадын хөрөнгө оруулалтыг татах ач холбогдолтойг Букеле тайлбарласан байна.

Тус улсын эрх баригчид сүүлийн жилүүдэд эрс шийдэмгий, заримдаа эргэлзээ төрүүлэм шинэчлэлтийг нэвтрүүлдэг болоод байгаа.

Тухайлбал 2021 онд Эль Сальвадор улс Олон Улсын Валютын Сангийн анхааруулгыг үл тоон биткоиныг албан ёсны төлбөрийн хэрэгсэл болгож байв. Ерөнхийлөгч Букеле бас гэмт хэрэгтэй маш ширүүн, харгис дайн зарлаж байлаа.

Тэрбээр үүний үр дүнд нийгмийн аюулгүй байдал эрс сайжирсан гэж үздэг. Гэхдээ сөрөг хүчнийхэн түүнийг бөөнөөр баривчлан хорих, эрүүдэн шүүх зэрэг хүний эрхийг ноцтой зөрчсөн үйлдлүүд гаргасан гэж шүүмжилдэг юм.

Букеле гадаадын мэргэжилтнүүдийг татах төлөвлөгөөгөө өөрийн Х хуудсаар зарласан бөгөөд одоогоор илүү дэлгэрэнгүй мэдээлэл өгөөгүй байна.

Эх сурвалж: CNN