ОХУ-ын тагнуулын албаны тэргүүн АНУ-ын өгсөн анхааруулга хэтэрхий ерөнхий байснаас Москвагийн “Crocus City Hall” цогцолборт гарсан террорист халдлагыг таслан зогсоож чадаагүйгээ тайлбарлажээ.

“Холбооны Аюулаас Хамгаалах Алба (ФСБ) зарим нэг мэдээллийг АНУ-ын талаас хүлээж авсан ч харамсалтай нь халдлагаас урьдчилан сэргийлэх боломжгүй байлаа. Мэдээлэл нь хэтэрхий ерөнхий байсан тул аймшигтай гэмт хэргийг үйлдсэн этгээдүүдийг бүрэн илрүүлэх боломж олдоогүйг манай хамтрагчид хэлж байгаа” гэж Оросын Гадаад Тагнуулын Албаны тэргүүн Сергей Нарышкин ярьсныг Интерфакс агентлаг уламжилсан байна.

ФСБ-ийн тэргүүн Александр Бортников өнгөрсөн долоо хоногт бас ижил утгатай зүйл ярьж байсан юм.

АНУ-аас гадна Иран улсын тусгай албад болзошгүй террорист халдлагын талаар холбоотон Москвагийн эрх баригчдад анхааруулж байсан гэх шинэ мэдээлэл саяхан тараад байна.

Харин Оросын эрх баригчид гуравдугаар сарын 22-нд гарсан уг халдлагад Украин болон Өрнөдийнхөн ямар нэг хэмжээгээр холбоотой хэмээн сэжиглэж буй.

Тухайлбал Даваа гарагт ОХУ-ын Гадаад Тагнуулын Албанаас гаргасан мэдэгдэлд Украины ерөнхийлөгч Володимир Зеленскийг хамгаалах зорилгоор Исламын Улс бүлэглэлийг террорист халдлагад буруутгаж байгаа АНУ-ын ерөнхийлөгч Жо Байденыг шүүмжилсэн байв.

Киев болон Өрнөдийн эрх баригчид Оросын талын хардлагыг няцаасаар байгаа. Исламын Улс зэвсэгт бүлэглэлийн Афганистан дахь салбар ISIS-K халдлагыг үйлдсэнээ хүлээсэн юм.

АНУ-ын өгсөн анхааруулгыг “нийгмийг тогтворгүй болгох, айлгах арга” хэмээн ОХУ-ын ерөнхийлөгч Путин халдлага гарахаас гурав хоногийн өмнө дотоод хэргийн яамны албан хаагчидтай уулзахдаа хэлж байв.

Эх сурвалж: Reuters