Хиймэл оюуны технологийн хөгжлийг тэргүүлэгчдийн нэг болох Nvidia компанийн үүсгэн байгуулагч, гүйцэтгэх захирал Женсен Хуан саяхан Хятад улсад зочилж, салбарын ажилтнуудтайгаа сар шинийн баяр тэмдэглэсэн тухай хэвлэлүүд мэдээлжээ.

Nvidia компанийн үйлдвэрлэдэг хагас дамжуулагч бүтээгдэхүүнүүд хиймэл оюуны системүүдэд өргөн ашиглагддаг.

Тайвань гаралтай Хуан дөрвөн жилийн дараа Хятадад ирсэн нь Бээжин, Шанхай, Шэнжэнь хотууд дахь салбарын ажилтнуудтайгаа уламжлалт сар шинийн баярыг тэмдэглэх зорилготой байжээ.

Хятадын хэвлэлүүд үндэсний хувцас өмсгөлтэй түүний тайзан дээр зүүн хойд нутгийн ардын бүжиг бүжиглэж буйг харуулсан дүрс бичлэгийг цацсан байна.

Одоо 60 настай Хуан үргэлж хар савхин хүрэмтэй олон нийтийн дунд явдгаараа танигдсан хүн юм. Түүний байнга өмсдөгөөсөө өөр хувцастай байгааг олон хүн харсан нь маш ховор тохиолдол ажээ.

Хуаны аялал АНУ-Хятадын худалдааны маргаан зөрчил гүнзгийрсэн цаг үетэй давхцаж байна. Аравдугаар сард ерөнхийлөгч Байдены засаг захиргаа хиймэл оюуны технологид ашигладаг зарим хагас дамжуулагч бүтээгдэхүүнийг Хятадад экспортлоход хязгаар тогтоосон юм.

Энэ шийдвэр орлогынхоо 20 хувийг Хятадын зах зээлээс олдог Nvidia компанид хүнд тусаж байгаа.

Арванхоёрдугаар сарын сүүлээр тус компани АНУ-ын экспортын хоригт нийцсэн бага хүчин чадалтай бүтээгдэхүүний хувилбарыг Хятадад гаргах боломжтой болсноо зарласан. Гэхдээ энэ нь Хятадын компаниудын сонирхлыг татахгүй байх магадлалтай байна.

Эх сурвалж: Business Insider