“Катар 2022” ДАШТ-ий бүтээн байгуулалтад ажиллаж буй цагаач ажилчдын хөдөлмөрийн үнэлэмж бага, нөхцөл хүнд, аюулгүй ажиллагааны дүрэм барьдаггүйгээс бол хэдэн мянган ажилчин амь насаа алдаад байгаа билээ. Тэгвэл цагаач ажилчдын эрхийг хамгаалах гэж оролдсон Абдулла Ибхайс гэгчид тус улсын шүүхээс гурван жилийн ял өгч шоронд хорьсон талаар хүний эрхийн байгууллагууд мэдээлж эхэллээ. Тэрээр ажилчдын эрхийг хамгаалах асуудлыг хөндөж тавихад шүүхээс авлига нэхсэн гэдэг үндэслэлээр гурван жилийн ял оноосон юм байна.

Абдулла Ибхайс нь “Катар 2022” хөлбөмбөгийн ДАШТ-ийг ЗБХ-ны хэвлэл мэдээлэл, олон нийттэй харилцах албанд удирдах албан тушаал хашиж байсан юм. Хүний эрхийн байгууллагуудын мэдээлж байгаагаар, тэрээр хөдөлмөрийн нөхцөл байдлаа дээрдүүлэхийг шаардан ажил хаясан цагаачдыг дэмжсэний улмаас шоронд хоригдсон гэж баталж буй. Харин Катарын эрх баригчид Абдулла Ибхайсыг хорьсон нь ДАШТ-тэй ямар ч холбоогүй, авлигын хэргээр шийтгүүлсэн гэсэн тайлбар өгсөөр байгаа юм. Абдулла Ибхайс өөрт нь оноосон ялыг эсэргүүцэж, шоронд өлсгөлөн зарлаад 31 хонож байгаа ажээ.