Дэлхийн томоохон криптовалютын биржүүдийн нэг FTX-ийг үүсгэн байгуулагч Сэм Бэнкман-Фрид харилцагчдынхаа их хэмжээний мөнгийг луйвардсан хэргээр яллагдлаа.

Хэдхэн цагийн өмнө Нью-Йорк хотын Манхэттэн дүүргийн 12 гишүүнтэй шүүгчдийн баг 31 настай бизнесмэнийг нийт долоон тусдаа гэмт хэрэгт буруутган ял оноох шийдвэр гаргажээ.

Түүнийг шунахайн сэдлээр биржийнхээ харилцагчдын $8 тэрбумын хөрөнгийг луйвардсан гэж прокурорууд өмнө нь дүгнээд байсан юм.

FTX бирж одоогоос жил хүрэхгүй хугацааны өмнө дампуурсан бөгөөд Сэм Бэнкман-Фридийн шүүх хурал нэг сар орчим хугацаанд үргэлжилсэн байна.

Энэ дампуурал тухайн үедээ Америкийн төдийгүй дэлхийн санхүүгийн ертөнцийг доргиож, $26 тэрбумын хөрөнгөтэй залуу бизнесмэнийг гэмт хэргийн сэжигтэн болгосон юм.

Өөрт нь тулгасан залилангийн хоёр, хуйвалдааны таван хэргийг Сэм Бэнкман-Фрид хүлээн зөвшөөрөхгүй байв. Шүүгч нар шийдвэр гаргахын тулд дөрвөн цаг хуралджээ.

“Криптовалютын салбар шинэ байж магадгүй. Сэм Бэнкман-Фрид шинэ тоглогч байж магадгүй. Гэхдээ ийм төрлийн хулгай луйвар эртнээс байсаар ирсэн бөгөөд бид үүнийг тэвчих ёсгүй юм” гэж хэргийг мөрдөн шалгасан Манхэттэн дүүргийн холбооны прокурор Дамиан Уилльямс шүүх хурлын дараа сэтгүүлчидтэй уулзахдаа мэдэгдсэн байна.

Массачусетсын Технологийн Их сургуулийн төгсөгч Сэм Бэнкман-Фридийн ялыг 2024 оны гуравдугаар сарын 28-наас эдлүүлэх шийдвэрийг шүүх гаргажээ.

Түүний хоригдох хугацааг шүүх жич шийдвэрлэх юм. Ямартай ч хэдэн арван жил хоригдох нь тодорхой болж байна.

Энэ хэрэг АНУ-ын санхүүгийн түүхэнд тэмдэглэгдсэн томоохон гэмт хэргүүдийн нэг болж, Сэм Бэнкман-Фридийн нэр “Понци” схемийг зохиосон Берни Мэдофф, “Уолстритийн Чоно” хочит Жордан Белфорт нарын цуутай луйварчидтай зэрэгцэн түүхэнд бичигдэх болж байгаа юм.

Эх сурвалж: Reuters