Японы “ALI Technologies” технологийн старт ап компанийн бүтээсэн “XTurismo Limited Edition” шинэ үеийн мотоцикл өчигдөр өглөөнөөс худалдаанд гарчээ. Дроны зарчмаар ажилладаг, өөрөөр хэлбэл нисдэг уг мотоцикл 680 000 ам.доллараар зарагдаж байна.

Токиод төвтэй “ALI Technologies” компанийн гол хөрөнгө оруулагч нь Mitsubishi болон нэрт хөлбөмбөгч Кейсуке Хонда юм байна.

Бүтээсэн компанийнх нь мэдээлснээр, “XTurismo Limited Edition” загвар нь 100 км цагийн хурдтайгаар тасралтгүй 40 минут нисэх чадалтай. Худалдаанд г,аргахын өмнө нисэх буудлуудын хооронд туршилтын нислэгийг олон удаа үйлдэж, аюулгүй байдлыг нь баталгаажуулсан гэнэ.

“XTurismo Limited Edition” нь нэг хүний даацтай, 300 кг жинтэй, дөрвөн цахилгаан хөдөлгүүртэй бөгөөд “ALI Technologies” 2022 оны эхний хагаст багтаад 200 ийм мотоцикл үйлдвэрлэхээр зорьж байгаа аж.