Баячуудыг хөрөнгөөр нь эрэмбэлдгээрээ зартай “Форбс” сэтгүүл “Tesla”, “SpaceX”-ийг үүсгэн байгуулагч Илон Маскийг дэлхийн хамгийн баян хүнээр тодруулжээ. Сэтгүүлийн шинжээчид хөрөнгийн биржүүдийн даваа гаргийн арилжааны дараах байдлаар 271.3 тэрбум ам.доллар гэж үнэлсэн байна. Цахилгаан автомашин үйлдвэрлэгч “Tesla”-гийн хувьцааны ханш 13 хувиар өссөн нь түүний хөрөнгийн хэмжээг гурав хоногийн дотор 41.7 тэрбум ам.доллараар өсгөжээ. Ингэснээр Илон Маск “Форбс” баячуудын хөрөнгийг үнэлж эхэлснээс хойших хамгийн их хөрөнгөтэй хүн болсон юм.

Илон Масктай холбоотой сүүлийн үеийн мэдээллээс дуулгахад, тэрээр энэ сарын эхээр цахилгаанаан хөдөлгүүртэй дуунаас хурдан онгоц бүтээх хүсэлтэй боловч амжихгүй байгаагаа олон нийтэд зарласан. Амжихгүй байгаагийнхаа шалтгааныг тэрээр “Дахин нэг ажил бариад авчихвал тархи маань дэлбэрчих гээд байна” хэмээн тайлбарласан юм.