Цэвэр эрчим хүчний эх үүсгүүрт шилжих үндэсний хэмжээний хөтөлбөрийн хүрээнд цөмийн нэгдэх урвалд (халуун цөмийн урвал) суурилсан анхны цахилгаан станцаа 2035 онд ашиглалтад оруулахаар байгааг АНУ-ын эрчим хүчний сайд Женифер Грэнхолм өчигдөр Вена хотод Ассошэйтэд Пресс агентлагт өгсөн ярилцлагадаа мэдэгджээ.

Цөмийн нэгдэх урвал нь хүлэмжийн хий ялгаруулалгүйгээр асар их эрчим хүч гаргах боломж олгодог физикийн үзэгдэл юм. Одоогийн цөмийн хуваагдалд суурилсан эрчим хүчний эх үүсгүүрүүдээс ялгаатай нь цацраг идэвхт хаягдал гардаггүйгээрээ давуу талтай.

Өнөөдөр цөмийн нэгдэх урвалын технологийг хөгжүүлэх чиглэлд АНУ тэргүүлж байгаа. Өнгөрсөн оны арванхоёрдугаар сард Калифорнийн Лоренс Ливерморын Үндэсний Лабораторид тус улсын судлаачид анх удаа цөмийн нэгдэх урвалыг амжилттай туршсан юм.

Энэ оны наймдугаар сард туршилтаа дахин давтахдаа өмнөхөөсөө илүү их эрчим хүч гаргаж чадсан гэдэг.

Устөрөгчийн атомуудыг хооронд нь шахаж нягтруулсны үр дүнд гелий хэмээх элемент үүсэхдээ асар их хэмжээний дулаан ялгаруулдаг. Энэ нь наран дээр явагддаг үйл явц юм.

Австрийн нийслэл Вена хотод болж буй НҮБ-ын Олон Улсын Атомын Эрчим Хүчний Агентлагийн хуралд оролцохдоо Грэнхолм дээрх төлөвлөгөөг танилцуулжээ.

Уг агентлаг нь дэлхийн 170 гаруй орны цөмийн хөтөлбөрүүдэд хяналт тавьдаг байгууллага юм.

Эх сурвалж: Associated Press