Хятадын засгийн газрын хөрөнгө оруулалт, гадаад худалдаа, олон улсын харилцааны чиглэлийн яам агентлагуудын албан хаагчдад ажил дээрээ iPhone хэрэглэхийг хориглосон шийдвэр өнгөрсөн сард гарсан тухай мэдээлэл өчигдөр хэвлэлүүдээр цацагджээ.

Хориг төрийн бүх албан хаагчдад үйлчлэхгүй, бусад гадаад брэндийн гар утаснуудад хамаарахгүйг холбогдох эх сурвалж South China Morning Post сонинд мэдээлсэн юм байна. Бас The Wall Street Journal сонин энэ мэдээллийг сүүлд баталжээ.

Үүний дараа өчигдөр Нью-Йоркийн хөрөнгийн бирж дээр Apple компанийн нэгж хувьцааны ханш 3.6 хувиар унаж, $182.91 орчимд хүрчээ.

Энэ нь сүүлийн нэг сар орчим хугацааны нэг өдрийн арилжаагаар хамгийн ихээр унасан тохиолдол болж байна.

Энэ уналтаас өмнө тус компанийн хувьцааны үнэ ханш оны эхнээс 46 хувиар өсөөд байсан юм.

iPhone бол Хятадын зах зээлд хамгийн алдартай гадаад брэндүүдийн нэг бөгөөд төр болон хувийн хэвшлийн аль алинд нь өргөн хэрэглэгддэг.

Хятад улс Apple компанийн хамгийн том гадаад зах зээл юм.

Сүүлийн жилүүдэд Америк-Хятадын худалдааны маргаан, өрсөлдөөн технологийн салбарт эрчимжсэн ч iPhone-ий нэр хүнд энэ зах зээлд өндөр хэвээр байгаа.

2022 онд Бээжингийн эрх баригчид тус улсын төрийн байгууллагууд, төрийн өмчит компаниудад бүх гадаад үйлдвэрийн компьютеруудаа солих хоёр жилийн хугацаа өгсөн юм.

Үүнтэй зэрэгцэн ерөнхийлөгч Жо Байдены засаг захиргаа орчин үеийн хагас дамжуулагч бүтээгдэхүүнүүдийг Хятадад экспортлохыг хориглосон шийдвэр гаргаад байгаа.

Apple компани нь үйлдвэрлэл болон борлуулалтын аль аль тал дээр Хятадын зах зээлээс ихээхэн хамааралтай юм.

Тус компани ирэх долоо хоногт iPhone ухаалаг гар утасныхаа шинэ загварыг танилцуулна.

Эх сурвалж: Bloomberg