Японы хамгийн өндөр настай иргэн, олимпын бамбарыг залуулж байсан хамгийн өндөр настай хүн болох Сигэко Кагава 115 насандаа таалал төгссөн талаар тус улсын Эрүүл мэнд, хөдөлмөр, нийгмийн хамгааллын яамнаас нийтэд мэдээллээ. Тэрээр Нара мужийн Яматокорияма хотод насан эцэслэсэн байна.

Түүний хувьд 1911 онд эмчийн гэр бүлд төрсөн тэрээр залуудаа анагаах ухааны чиглэлээр суралцаж, эмэгтэйчүүдийн болон дотор өвчний эмчээр 80 гаруй нас хүртлээ тасралтгүй ажиллажээ.

2021 оны Токиогийн Олимпын наадмын үеэр 109 настайдаа бамбар буухиалах ажиллагаанд оролцож, "Дэлхийн хамгийн өндөр настай олимпын бамбар залуулагч"-аар Гиннесийн амжилтын номд бүртгэгдэж байв.

Тэрээр залуудаа өвчтөнүүд рүүгээ байнга явган алхаж очдог байснаа дурдаж, өдөр тутмын идэвхтэй хөдөлгөөн, ажилтай байх нь урт наслахын хамгийн том үндэс гэж ярьдаг байжээ.

Түүнийг таалал төгссөний дараа Японы хамгийн өндөр настай хүнээр Киото мужид оршин суудаг 114 настай Фүёо Кишимото (Fuyo Kishimoto) тодорч байна. Японы Засгийн газрын судалгаагаар тус улсад 100 ба түүнээс дээш настай 92,000 гаруй иргэн байдгийн 88 хувь нь эмэгтэйчүүд байдаг аж.