ОХУ дотоодын зах зээл дэх түлшний хомсдол, үнийн өсөлтийг тогтворжуулах зорилгоор дизель түлшний экспортыг бүрэн хориглох асуудлыг Засгийн газрын түвшиндээ яаралтай авч хэлэлцэж эхэлжээ.

ОХУ-ын Шадар сайд Александр Новак Ерөнхийлөгч Владимир Путинтай хийсэн уулзалтын үеэр дотоодын зах зээлийг хамгаалах үүднээс дизель болон керосины экспортод хориг тавих, эсвэл татварын зохицуулалт хийх хувилбаруудыг боловсруулж байгаагаа мэдэгдсэн байна. Тэрбээр одоогийн нөхцөл байдлыг "амаргүй, гэхдээ хяналтад байгаа" гэж тодорхойлжээ.

Украины талаас ОХУ-ын төв хэсэгт байрлах газрын тос боловсруулах хэд хэдэн томоохон үйлдвэрт дроноор цуврал цохилт өгсөний улмаас энэ сарын бензин, шатахуун үйлдвэрлэл өмнөх оны мөн үетэй харьцуулахад даруй 25 хувиар буурсан байна.

Түлшний нийлүүлэлт тасалдсаны улмаас ОХУ-ын хэд хэдэн бүс нутагт борлуулалтын хязгаарлалт хийж эхэлсэн бөгөөд аннексилогдсон Крымд хувь хүмүүст түлш худалдаалахыг бүрэн зогсоож, ШТС-уудад урт дараалал үүсжээ. Эрх баригчдын зүгээс үүнийг "зориудын хомсдол, хэт их эрэлт үүсгэхгүй байх түр зуурын зохицуулалт" гэж тайлбарлаж байна.