Нигер улсын нийслэл Ниамей хотын Диори Хамани олон улсын нисэх буудалд зэвсэгт халдлага гарч, 11 цэрэг, 2 энгийн иргэн амь үрэгдсэн талаар тус улсын Батлан хамгаалах яамнаас мэдээллээ.

Аюулгүй байдлыг хангах хүчнийхэн шуурхай хариу арга хэмжээ авч, зэвсэгт этгээдүүдтэй хэдэн цагийн турш ширүүн буудалцсаны эцэст халдлагад оролцсон 22 этгээдийг устгаж, 20 орчим сэжигтнийг баривчилсан байна. Халдагчид нисэх буудлын ойролцоох хамгаалалтын шалган нэвтрүүлэх цэгт таксигаар ирж, гэнэтийн дайралт хийсэн бөгөөд тулааны явцад дөрвөн хүн шархаджээ.

Уг халдлагын хариуцлагыг "Аль-Каида" террор бүлэглэлтэй холбоотой Jama'at Nusrat al-Islam wal-Muslimin (JNIM) бүлэглэл өөрийн суртал ухуулгын "Аз-Заллака" сувгаараа дамжуулан хүлээсэн бөгөөд үүнийгээ "амиа золиослогчийн ажиллагаа" байсан хэмээн мэдэгдэв.

Халдлагад өртсөн Диори Хамани олон улсын нисэх буудал нь тус улсын стратегийн хамгийн чухал цэргийн байгууламжуудын нэг юм. Энд Сахелийн бүсийн орнуудын терроризмын эсрэг хамтарсан хүчин болон Оросын цэргийн хүчний (Africa Corps) бааз байрладаг бөгөөд Нигер улсын экспортод гаргадаг ураны нөөцийн тодорхой хэсгийг мөн хадгалдаг байна. Тус байгууламж руу энэ оны нэгдүгээр сард "Исламын улс" бүлэглэл мөн халдаж байсан бөгөөд энэ нь хоёр дахь удаагийн томоохон дайралт болж байна.