Өнөө өглөө орон нутгийн цагаар 07:37 цагт Филиппиний өмнөд хэсэгт орших Минданао арлын бүс нутагт 7.8 магнитудын хүчтэй газар хөдлөлт боллоо.

АНУ-ын Геологийн албаны (USGS) мэдээлснээр, газар хөдлөлтийн голомт нь Филиппиний Буриас суурингаас баруун өмнө зүгт 24.7 километр зайд, газрын гүнд 35 километрийн гүнд байжээ.

Газар хөдлөлтийн хүчтэй чичирхийлэл Минданао арлын томоохон хотуудад маш хүчтэй мэдрэгдсэн байна. Орон нутгийн хэвлэлүүдийн мэдээлж буйгаар Генерал Сантос зэрэг хотуудад барилга байгууламжууд, худалдааны төвүүд нурж, цахилгаан эрчим хүч тасарчээ. Нурангин доор хүмүүс дарагдсан байж болзошгүй тул эрэн хайх, аврах ажиллагааг яаралтай эхлүүлээд байна. Одоогоор урьдчилсан байдлаар 1 хүн амь үрэгдэж, хэд хэдэн хүн бэртэж гэмтсэн мэдээлэл иржээ.

Чичирхийлэл зөвхөн Филиппинд төдийгүй хөрш зэргэлдээ Индонезийн Хойд Сулавеси болон Хойд Малуку мужуудад мэдрэгдсэн байна.

Филиппиний Галт уул, сейсмологийн хүрээлэн (Phivolcs) болон Номхон далайн цунамигийн сэрэмжлүүлгийн төвөөс (PTWC) далайн эргийн дагуу амьдарч буй иргэдийг яаралтай өндөрлөг газарт нүүн шилжихийг анхаарууллаа.

• Филиппин: Зарим эрэг орчмоор 3 метр хүртэл өндөртэй цунамигийн давалгаа үүсэх эрсдэлтэй.

• Индонез, Малайз: Эргийн дагуу 1 метр хүртэл өндөр давалгаа үүсэж болзошгүй.

• Бусад бүс нутаг: Тайвань, Япон, Гуам, Папуа Шинэ Гвиней зэрэг Номхон далайн баруун хэсгийн арлын улсуудад арай бага хэмжээний цунамигийн түгшүүр зарлаад байна.

Үндсэн газар хөдлөлтийн дараа одоогийн байдлаар 6.0 магнитудаас дээш хүчтэй хэд хэдэн давтан чичирхийлэл бүртгэгдсэн бөгөөд мэргэжлийн байгууллагууд иргэдийг сонор сэрэмжтэй байхыг уриалж байна. Тус улсын Ерөнхийлөгч бага Фердинанд Маркос гамшгийн бүсэд тусламж үзүүлэх, нүүлгэн шилжүүлэх ажлыг эрчимжүүлэх үүргийг холбогдох албаныханд өгчээ.