Бүгд Найрамдах Ардчилсан Конго Улсад дэгдээд буй эболагийн халдварын улмаас нас барагсдын тоо 100 давж, олон улсын эрүүл мэндийн байгууллагууд өндөржүүлсэн бэлэн байдалд шилжжээ.

Гадаадын хэвлэлүүдийн мэдээлснээр, Конго улсын зүүн бүсэд тархаад буй энэхүү дэгдэлт нь “Бундибугё” төрлийн ховор омгийн вирусээр үүсгэгдсэн бөгөөд халдвар маш хурдтай нэмэгдэж байгаа аж. Дэлхийн эрүүл мэндийн байгууллагагийн мэдээлснээр одоогийн байдлаар батлагдсан болон сэжигтэй тохиолдлын тоо 500 давж, нас баралт 131 хүрсэн байна.

Одоогоор халдварын тохиолдол Уганда улсад бүртгэгдээд байгаа бөгөөд бүс нутгийн хэмжээнд хөл хорио, тандалт, тусгаарлалтын арга хэмжээг чангатгажээ. Эрүүл мэндийн байгууллагууд ариун цэврийн дэглэм сахих, халдварын шинж тэмдэг илэрсэн тохиолдолд яаралтай эмнэлэгт хандахыг иргэдэд зөвлөж байна.

Эбола вирус нь өндөр халуурах, цус алдах, олон эрхтний дутагдал үүсгэх аюултай бөгөөд халдвар авсан хүмүүсийн нас баралтын түвшин өндөрт тооцогддог.