Тэрбумтан бизнесмэн Элон Маск БНХАУ-д болсон АНУ, Хятадын өндөр түвшний уулзалтуудад зургаан настай хүү X Æ A-Xii-гээ дагуулан оролцсон нь олон улсын хэвлэлүүд болон цахим орчинд өргөн анхаарал татлаа. Тэрбээр Бээжин хотын Ардын их танхимд болсон дээд хэмжээний уулзалтын үеэр хүүгийнхээ гараас хөтлөн хүрэлцэн ирсэн бөгөөд уг уулзалтад АНУ-ын нэр хүндтэй бизнесийн удирдагчид болон төрийн өндөр албан тушаалтнууд оролцжээ.

X Æ A-Xii уламжлалт хятад хэв маягийн хантааз өмсөж, жижиг цүнхтэйгээр олны өмнө гарсан нь дипломат ёслолын дунд содон дүр зураг болж, сошиал хэрэглэгчдийн анхаарлыг татсан байна. Зарим хүмүүс Маскийг гэр бүлийн халуун дулаан дүр төрхийг харууллаа хэмээн үнэлсэн бол нөгөө хэсэг нь бага насны хүүхдээ төр, бизнесийн өндөр ач холбогдолтой уулзалтуудад тогтмол оролцуулж буйг шүүмжилжээ.

Энэ нь Маск хүүгээ олон нийтийн томоохон арга хэмжээнд дагуулж ирсэн анхны тохиолдол биш бөгөөд өмнө нь Цагаан ордон болон бусад улс төр, бизнесийн уулзалтуудад хамт харагдаж байсан юм. Ийнхүү түүний хувийн амьдрал, гэр бүлийн оролцоо нь дэлхийн хэмжээний дипломат болон эдийн засгийн үйл явдлын үеэр дахин олон нийтийн анхаарлын төвд орлоо.