АНУ-ын Нью-Йорк хотын холбооны шүүгч Кеннет Карас бэлгийн мөлжлөг, хүн худалдаалах хэрэгт буруутгагдаж байсан санхүүч Jeffrey Epstein-ий бичсэн гэх сүүлчийн гар бичмэл тэмдэглэлийг олон нийтэд ил болголоо. Уг баримт нь 2019 онд Эпштейн анхны амиа хорлох оролдлогын дараа түүний хамт хоригдож байсан Николас Тартальоне олсон гэж мэдүүлсэн бөгөөд шүүхийн материалд олон жил битүүмжлэгдэн хадгалагдаж байжээ.

Тэмдэглэлд “Тэд намайг хэдэн сар шалгаад юу ч олоогүй”, “Өөрийнхөөрөө баяртай гэж хэлэх цагийг сонгох нь онцгой хэрэг”, “NO FUN – NOT WORTH IT!!” гэх мэт үгс бичигдсэн байсан нь Эпштейний сэтгэлзүйн байдлыг харуулж болзошгүй гэж үзэж байна. Гэсэн ч АНУ-ын Хууль зүйн яам уг бичгийг албан ёсоор баталгаажуулаагүй бөгөөд жинхэнэ эсэх нь бүрэн тогтоогдоогүй хэвээр байна.

Энэхүү баримтыг The New York Times сонины хүсэлтийн дагуу шүүх нийтэд нээлттэй болгосон бөгөөд энэ нь Эпштейний үхлийн нөхцөл байдалтай холбоотой олон нийтийн эргэлзээ, хардлагыг дахин сэргээжээ. Эпштейн 2019 оны наймдугаар сард Манхэттэний хорих төвд нас барсан бөгөөд албан ёсны дүгнэлтээр амиа хорлосон гэж үзсэн ч түүний үхэл өнөөг хүртэл маргаантай хэвээр байгаа юм.