ОХУ-ын нийслэл Москва хотод Ялалтын баярын арга хэмжээний өмнөх өдрүүдээс эхлэн мобайл интернет, SMS болон холбооны зарим үйлчилгээнд түр хязгаарлалт хийхээр болсон нь оршин суугчдын өдөр тутмын амьдралд томоохон нөлөө үзүүлж байна. Оросын үүрэн холбооны операторууд хэрэглэгчдэдээ тавдугаар сарын 5-9-ний хооронд сүлжээ тасалдах, интернетийн хурд буурах эрсдэлтэй талаар анхааруулжээ.

Кремль энэ арга хэмжээг Украины дроны болзошгүй халдлагаас урьдчилан сэргийлэх аюулгүй байдлын арга хэмжээ гэж тайлбарласан байна. Үүний улмаас Москва хотод такси дуудах, цахим төлбөр хийх, навигац ашиглах зэрэг өдөр тутмын үйлчилгээ доголдож, зарим бүсэд зөвхөн Wi-Fi сүлжээ ажиллаж байгаа талаар мэдээлжээ.

Интернетийн энэхүү түр хязгаарлалт нь ОХУ дотоод аюулгүй байдал, мэдээллийн хяналтаа улам чангатгаж буйн нэг илрэл гэж олон улсын хэвлэлүүд онцолж байна.